Sý tasqyny: Oral qalasynda zardap shekken turǵyndardan ótinish qabyldaý bastaldy
«Qazgıdromet» RMK BQO fılıalynyń dırektory Tilegen Shapanovtyń málim etkenindeı, 5 sáýirdegi saǵat 08.00-degi aqparat boıynsha oblystyń bas ózeni Oral qalasy tusynda bir táýlikte 72 santımetrge joǵarylap, 661 santımetrge (qaýipti shegi – 850 sm) jetti. Bul deńgeı Oral qalasyndaǵy ózen jaıylmalarynda ornalasqan saıajaılarǵa qaýip tóndiredi.
«Sonymen qatar Jaıyqqa quıatyn Shaǵan ózeninen keletin qaýip seıile qoıǵan joq. Shaǵan Báıterek aýdany Chývashın tusynda qaýipti deńgeıden 10 santımetrge (+6, 1310) asty. Elek ózeni Shyńǵyrlaýda óziniń joǵary deńgeıinde (782 sm) tur. Oblystyń basqa ózenderinde sý deńgeıiniń túsýi baıqalady», dedi T.Shapanov.
Oral qalasy ákimdiginen túsken málimetke qaraǵanda, ózen jaıylmalarynda ornalasqan saıajaılarda turatyn adamdarǵa qajetti qujattaryn alyp, aldyn ala týma-týystaryna bara berýi kerektigi eskertildi.
«Evakýatsııa jóninde qosymsha habarlanady. Qazirgi ýaqytta qaladaǵy 4 evakopýnktte 400-deı adam bar. Sonymen qatar qalada sý tasqyny saldarynan zardap shekkenderge keltirilgen zııandy (nuqsandy) esepteý jáne óteý úshin turǵyndardan ótinish qabyldaý bastaldy. Ol úshin turǵyndar qalalyq komıssııaǵa keltirilgen nuqsandy óteý týraly ótinish berýi kerek. Zardap shekken adamnyń jeke basyn kýálandyratyn qujattyń kóshirmesi (tabıǵı sıpattaǵy tótenshe jaǵdaı saldarynan nemese tótenshe jaǵdaıdy joıý kezeńinde osyndaı qujat joǵalǵan nemese joıylǵan jaǵdaıda – ishki ister organdary bergen ýaqytsha jeke kýálik) qosa beriledi. Tabıǵı sıpattaǵy tótenshe jaǵdaı týyndaǵan kezden bastap nemese tótenshe jaǵdaıdy joıý kezeńinde zardap shekkenniń joıylǵan nemese búlingen múlkiniń tizbesi, jyljymaıtyn múlikke quqyq belgileıtin qujattary (qaýly, obektini paıdalanýǵa qabyldaý aktisi, satyp alý-satý sharty jáne t.b.), jyljymaıtyn múlik obektisiniń sáıkestendirý qujattary (jer ýchaskesine menshik quqyǵy týraly aktisi jáne tehnıkalyq pasporty) da tirkeledi. Qujattardy qabyldaý kelesi mekenjaı boıynsha júrgiziledi: «Teń qoǵam» áleýmettik qoldaý ortalyǵy (Oral qalasy, M.Yqsanov kóshesi 46/1 úı). Qujattar dúısenbi-juma kúnderi saǵat 9.00-18.30 (13.00-14.30 túski úzilis) aralyǵynda qabyldanady», – dep habarlady vedomstvodan.
Eske sala keteıik, budan buryn Jaıyq ózeni Oral qalasy tusynda 10 metrge kóteriletini týraly jalǵan aqparat taraǵanyn jazǵan bolatynbyz.