Sý tasqyny: Qostanaı oblysynda úısiz qalǵandarǵa páter satyp alý bastaldy

<p>ASTANA. KAZINFORM &ndash; Qostanaı oblysynda sý tasqyny saldarynan 981 bas mal qyrylǵan. Sonyń 800-den astamyna baǵalaý esebi daıyndaldy. Bul týraly Qostanaı oblysy ákimdiginiń Qarjy basqarmasy basshysynyń orynbasary Alma Júsipova aıtty.</p>

«Kelgen shyǵyndy baǵalaý jónindegi komıssııaǵa 2439 ótinim kelip tústi. Jergilikti atqarýshy organdar tólemderge qatysty qarqyndy jumys atqaryp jatyr. Bul maqsatqa 5 mlrd teńgege jýyq qarajat jergilikti bıýdjetten bólindi. Osy qarajat áleýmettik tólemge, ótemaqyǵa, sondaı-aq avtokólik joldary men elektr energııasy jelisin qalpyna keltirýge baǵyttalady. Sonymen qatar, Úkimet rezervinen qosymsha 405 mln teńge bólinip, Arqalyq qalasynan 31 páter satyp alyndy», - dedi A. Júsipova Ortalyq kommýnıkatsııalar qyzmetindegi brıfıngide.

Onyń aıtýynsha, óńirde 1100 úıge tehnıkalyq baǵalaý jasalyp, sonyń arasynda 711 úı qalpyna keltiriledi. Bul úılerge qatysty ótemaqy tólenedi. Al jóndeýge jaramaı qalǵan úılerdiń sany 378 boldy. Olardyń turǵyndaryna baspana satyp alynady.

«Veterınarlyq qyzmettiń málimetinshe, sý tasqyny saldarynan 981 bas mal qyrylǵan. Bul rette, baǵalaý júrgizilgennen keıin ótemaqy tólenedi. Qazir 806 bas boıynsha baǵalaý aktisi jasalyp, 161 mln teńge somasynda tólem jasaldy», - dedi basqarma ókili. 

Birjolǵy áleýmettik kómekke toqtalsaq, 1915 ótinim boıynsha 739 mln teńge tólendi. Qazir ótinim qabyldaý jalǵasyp jatyr.