Kólik mınıstrligi tótenshe jaǵdaı kezinde salada qandaı sharalardy qolǵa aldy

<p>ASTANA. KAZINFORM - Elimizdiń kólik salasynyń mamandary tabıǵı apattan zardap shekkenderge kómek kórsetý jáne sý tasqynynyń saldarlarymen kúresý maqsatynda jedel sharalardy qolǵa aldy. Kóliktiń barlyq túriniń is-qımylyn úılestirý úshin jedel shtab qurylyp, jolaýshylardy, túrli tehnıkany, gýmanıtarlyq júkterdi tasymaldaý boıynsha jumystar uıymdastyryldy.</p>

Avtojol

* Sý tasqyny kezeńinde jol qyzmeti ortalyq jáne jergilikti deńgeılerde jedel shtab qurýmen kúsheıtilgen jumys rejımine aýystyryldy.

* Jolshylar táýlik ishinde 4 kópirde qalpyna keltirý jumystaryn júrgizdi, óz kúshterimen 33 km joldyń qozǵalysy qalpyna keltirildi,

* Soltústik, batys óńirlerge elimizdiń 15 óńirinen myńnan astam jolshy men 1,5 myń birlik jol-qurylys tehnıkasy jumyldyryldy.

* Jol qyzmetteri erigen sýdy ótkizý úshin 4 oblysta 9 ýchaskede joldy jasandy túrde buzý boıynsha májbúrli sharalar qabyldady.

Avıatsııa

* Qazaqstandyq áýe kompanııalary 51 qosymsha reıs oryndap, Atyraý qalasynan 9 myńnan astam jolaýshy tasymaldady.

* 12 sáýirden 20 sáýirge deıin tasymaldaýshylar Atyraý qalasynan jalpy syıymdylyǵy 14 217 oryndyq 76 qosymsha reıs josparlaǵan.

* Qazaqstandyq avıakompanııalar 1,1 mlrd teńge gýmanıtarlyq kómek bóldi, áýe kompanııalar 100 tonnadan astam gýmanıtarlyq júk jetkizdi.

* Atyraý-Astana jáne Atyraý-Almaty marshrýttarynda ekonom-klass bıletteriniń eń joǵary quny 40 myń teńgege deıin (balalarǵa arnalǵan bıletter osy tarıften 50% jeńildikpen) tómendetildi.

Temirjol kóligi

* Evakýatsııa kezeńinde «Atyraý-Qulsary-Mańǵystaý» baǵyttary boıynsha 12,5 myń jolaýshy tegin tasymaldandy, qosymsha 14 jolaýshy vagony bólindi.

• Suranystyń artýyna baılanysty batys óńirlerden Qyzylorda, Qaraǵandy, Almaty jáne Astana baǵytynda qosymsha marshrýttar men tirkeme vagondar uıymdastyryldy, 4,5 myń jolaýshy tasymaldandy.

* 500 balany emdeý-saýyqtyrý ortalyqtary men lagerlerge tasymaldaý qamtamasyz etiledi.

* Júkterdi joǵary jyldamdyqpen jáne tegin negizde jetkizgen myńnan astam aýyr tehnıkany tasymaldaý úshin 700-ge jýyq temirjol platformasy bólindi. Halyqqa kómek kórsetý úshin QR TJM jeke quramynyń 4,5 myńǵa jýyq adamy tasymaldandy.

* Inertti materıaldardy tasymaldaý, pontondyq (qurama) kópirlerdi soltústik-batys óńirlerge qalpyna keltirý jumystaryna jetkizý jalǵasýda.

Avtokólik

«Qulsary-Dossor» respýblıkalyq trassasy ýchaskesin sý basýyna baılanysty ózbek tarapymen Qulsary mańynda turyp qalǵan fýrlardy ótkizý týraly kelissózder júrgizildi. Mańǵystaý jáne Túrkistan oblystaryndaǵy «Tájen» jáne «Qonysbaev» ótkizý pýnktterinen Ózbekstan Respýblıkasynyń aýmaǵy arqyly qazaqstandyq avtokólik quraldarynyń tranzıtpen ótýiniń ońaılatylǵan tártibi týraly másele pysyqtaldy.

Kólik salasynyń mamandary zardap shekken óńirler men azamattarǵa qajetti kómek kórsetýdi jalǵastyrady, sondaı-aq búlingen ınfraqurylymdy qalpyna keltirý jónindegi jumystarǵa tikeleı qatysady.