Sý tasqyny: Qyzylqoǵa aýdanynda zardap shekkenderdiń shyǵyny tolyǵymen óteldi

<p>ATYRAÝ. KAZINFORM &ndash; Atyraý oblysynyń Qyzylqoǵa aýdanynda Oıyl ózeni tasyp, birneshe eldi mekenge qaýip tóndi. Sý basý qaýpin seıiltý úshin jol jyrylyp, bóget turǵyzyldy.&nbsp;</p>

Qyzylqoǵa aýdandyq ákimdiginiń málimetine súıensek, tasqyn sýdyń saldarynan sharýashylyq jetekshilerine keltirilgen shyǵyn tolyq ótelgen.

«Tabıǵı sıpattaǵy tótenshe jaǵdaıdan zardap shekkenderge keltirilgen zııandy baǵalaý jáne óteý jónindegi komıssııaǵa mal shyǵyny boıynsha 70 ótinish tústi. Komıssııanyń qorytyndysymen 58 sharýa qojalyǵy men jeke tulǵalardyń 191 maly úshin bıýdjetten jáne ózge kózderden 61 mln 772 myń 062 (alpys bir mıllıon jeti júz jetpis eki myń alpys eki) teńge ótemaqy tólendi», - dep habarlady aýdandyq ákimdikten. 

Sondaı-aq, arnaıy qurylǵan komıssııaǵa sý tasqynynan zardap shekken 31 turǵyn úı ıesi ótinish bergen. Onyń ishinde 7 turǵyn úı qujattarynyń joq bolýyna baılanysty keri qaıtarylǵan. Al, 24 ótinish qanaǵattandyrylyp otyr.

«Aýdan ákimi Qanat Ázmuhanovtyń tikeleı baqylaýymen tasqynnan zardap shekken turǵyndardyń ótinishine oraı shyǵyndy baǵalaýǵa tehnıkalyq baǵalaýshylar tartyldy. Tehnıkalyq qorytyndyǵa sáıkes 6 turǵyn úıge jóndeý jumystaryn júrgizý qajettigi anyqtaldy. Al, 18 turǵyn úı apatty dep tanyldy. Aýdan ákimi baǵalaý júrgizýshi mamandardyń qorytyndy hattamalaryn turǵyndarǵa tanystyrdy. Tórt turǵyn úı surady. Baǵalaý nátıjesimen 20 turǵynǵa búlingen úı úshin qarjy bólinip, tolyq óteldi», - dep málim etti aýdandyq ákimdikten.

Qazir Qyzylqoǵa aýdanyndaǵy Qonystaný aýylynda 3 turǵyn úıdiń qurylysy júrip jatyr. Sondaı-aq, Mııaly aýylynda 1 turǵyn úıdiń qurylysyn júrgizý bastaldy.

Eske sala ketelik, Jylyoıda sý tasqynynan búlingen nysandardy qalpyna keltirýge 21,4 mlrd teńge kerek ekenin jazǵan edik.