Sý tasqyny kezinde ýaqytpen sanaspaı eńbek ettik - qyzylordalyq qutqarýshy

<p>ASTANA. KAZINFORM - Memleket basshysynyń Jarlyǵymen elimizdiń sý tasqyny bolǵan óńirlerinde qutqarý jumysyna belsene qatysqan Qyzylorda oblystyq tótenshe jaǵdaılar departamentiniń qyzmetkeri Erkin Ámirhanov &laquo;Erligi úshin&raquo; medalimen marapattaldy.</p>

Bul - óz salasynda 12 jyldan astam tájirıbe jınaqtaǵan mamanǵa berilgen laıyqty baǵa.

Erkin Ámirhanov azamattyq qorǵaý salasynda eńbek etip keledi. Óziniń qyzmettik mindetterin tıimdi jáne adal oryndaıdy. Qazir Qyzylorda oblysy TJD Jedel-qutqarý jasaǵynyń bas qutqarýshysy qyzmetin abyroımen atqarady.

«Biz elimizde bolǵan sý tasqynynyń aldyn alý úshin ýaqytpen sanaspaı eńbek ettik. Qyzylordalyq qutqarýshylardy 1 sáýirden bastap Aqtóbe, Qostanaı, Batys Qazaqstan jáne Atyraý oblystaryndaǵy sý tasqynymen kúreske kómek kórsetýge jiberdi. 2-6 sáýir aralyǵynda Aqtóbe oblysy Áıteke bı aýdany Áıke aýylyndaǵy sý tasqynynyń aldyn alý baǵytynda jumys istedik. Táýliktiń kez kelgen ýaqytynda eńbek ettik. Aýa raıynyń qolaısyzdyǵyna qaraǵan joqpyz. Qutqarý jáne evakýatsııalaý jumystaryna belsene atsalystyq, sol arqyly aýyldyń 1395 turǵynyn qaýipsiz jerge shyǵarýǵa kóńil bóldik. Sý basqan aýmaqtyń halqyn batys jaq betinen shyǵys jaq betine qaraı tasymaldadyq», - deıdi ol.

Foto: Qyzylorda oblystyq tótenshe jaǵdaılar departamenti

Sondaı-aq qyzylordalyq qutqarýshylar 7-11 sáýir aralyǵynda Qostanaı oblysy Tobyl ózeni jaǵasyn qum toltyrylǵan qaptarmen bekitti, qaýipti aýmaqtarda kezekshilik júrgizýge belsendi qatysty.

«Al 19-20 sáýir aralyǵynda Oral qalasy aýmaǵynda ornalasqan saıajaı turǵyndaryn evakýatsııalaý men bógetterdi kúsheıtý jumystaryn júrgizgen edik. Oǵan qosa. 24 sáýir-21 mamyr aralyǵynda Atyraý oblysy Inder aýdany Jarsýat aýylynda Jaıyq ózenindegi mol sýdyń saldarynan aralda qalyp qoıǵan 172 bas maldy qaýipsiz jerge shyǵarý jumystaryn atqardyq», - deı ol.