Sý tasqyny kezinde qaza tapqan atyraýlyq qutqarýshy «Aıbyn» ordenimen marapattaldy

<p>ATYRAÝ. KAZINFORM &ndash; Búgin Atyraý oblysy Tótenshe jaǵdaılar departamentinde sý tasqyny kezinde qyzmettik mindetterin atqarý barysynda qaza tapqan Raqym Beıbarys Jalǵasbaıulyn eske alýǵa arnalǵan jıyn ótti.</p>

Jıynǵa QR TJM apparat basshysy azamattyq qorǵaý polkovnıgi Erǵalı Bahaev jáne departament qyzmetkerleri men marqumnyń týystary qatysty. Atalǵan is-shara 1 mınýt únsizdikpen qaza tapqan qutqarýshyny eske alýmen bastaldy. 

Foto: Atyraý oblysy TJD qoǵammen baılanys toby

Jıyn barysynda Erǵalı Bahaev QR TJ mınıstri Shyńǵys Árinovtyń atynan qaıǵyryp kóńil aıtyp, №1 MÓSB bólimshe komandıri marqum Beıbarys Raqymnyń týystaryna «Qyzmettik jáne azamattyq boryshyn atqarýdaǵy janqııarlyǵy, sondaı-aq tótenshe jaǵdaıda kórsetken erligi úshin» Rahymjan Qoshqarbaev atyndaǵy ІІІ dárejeli «Aıbyn» ordenin tabystady. Qaıtys bolǵan qutqarýshy Prezıdent Jarlyǵymen marapattaldy.

«Departament bastyǵy polkovnık Nurlan Jańabaev jáne ardagerler keńesiniń tóraǵasy Seıtjan Dúısekenov qutqarýshynyń erligin atap ótip, qaza tapqan áriptesimiz batyldyqtyń sımvoly retinde máńgi jadymyzda saqtalatynyn aıtty», - delingen TJM habarlamasynda.