Sý tasqyny kezinde bilikti mamandar men ǵalymdardyń tapshylyǵy aıqyn sezilip otyr - Prezıdent
«Eń aldymen, men elimizdegi qazirgi ahýalǵa toqtalyp ótkim keledi. Jaǵdaıdy kórip, bilip otyrsyzdar, aımaqtarda seksen jyl bolmaǵan joıqyn sý tasqyny bolyp jatyr. Kóptegen eldi mekendi qarǵyn sý basty. Jalpy ahýal óte kúrdeli.
Qazir Úkimet barlyq qajetti sharalardy jedel túrde qabyldap jatyr. Tıisti tapsyrmalardy berdim, jaǵdaıdy baqylaýda ustap otyrmyz. Tabıǵattyń tosyn minezinen basqa da elder zardap shegýde. Álemniń ár túkpirinde jer silkinisi, órt, sý tasqyny bolyp jatyr. Bir sózben, jahandyq klımat ózgerip, tabıǵı apattar jıilep ketti.
1980-1985 jyldary álemde 1700-ge jýyq tabıǵı apat bolǵan. Al 2010-2015 jyldary apattardyń sany 3700-den asqan. ıAǵnı az ýaqyttyń ishinde tabıǵı apat sany eki ese kóbeıdi. Jartysyna jýyǵy – sýǵa qatysty apattar. Árıne, bul – búkil adamzatqa tónip turǵan óte úlken qater. Sondyqtan mundaı apattardyń aldyn alyp, azamattardyń amandyǵyn qamtamasyz etý – asa mańyzdy mindet. Ǵylym – bul mindetti iske asyrýdyń birden-bir joly», - dedi QR Prezıdenti.
Sondaı-aq, Qasym-Jomart Toqaev elimizde bolyp jatqan sý tasqyny kezinde bilikti mamandar men ǵalymdardyń tapshylyǵy aıqyn sezilip otyrǵanyn atap ótti.
«Ásirese, elimizde bolyp jatqan sý tasqyny kezinde bilikti mamandar men ǵalymdardyń tapshylyǵy aıqyn sezilip otyr. Men ǵylymdy damytý týraly únemi aıtyp júrmin. Árıne, ǵylymdy bir kúnde nemese bir jylda damytyp jiberý múmkin emes. Uzaq ýaqyt tabandy jumys isteý kerek.
Ókinishke qaraı, Qazaqstanda ondaǵan jyl boıy ǵylymǵa jete mán berilgen joq. Shynyn aıtý kerek. Elimizdiń burynǵy ǵylymı áleýeti men ınfraqurylymyn joǵaltyp aldyq. 40 myń ǵalym 90-shy jyldardaǵy qıyn kezeńde ǵylymnan múlde qol úzdi. Keıbir ınstıtýttar saqtalyp qalǵanymen, jalpy ǵylym birtutas júıe retinde qatty álsirep ketti. Osynyń saldary endi kórinip jatyr. Biz elimizdiń ǵylymı áleýetin qalpyna keltirýimiz kerek.
Al sý tasqynyna oralsaq, aldymyzda turǵan mindetter – óte kúrdeli, aýqymdy. Apattan zardap shekken azamattarǵa barlyq qajetti jaǵdaıdy jasaýymyz kerek. Bul – qomaqty qarajatty talap etetin jumys. Biraq biz halyqtyń aldyndaǵy mindettemelerimizdi tolyǵymen oryndaımyz. Bul – paryz. Men úshin bul – eń mańyzdy jáne dál qazirgi kezdegi eń qajetti jumys», - dedi Memleket basshysy.
Odan bólek, Prezıdent ǵylymǵa arqa súıegen memleketter álemniń damý kóshin bastap turǵanyn, biz de ǵylymdy qarqyndy damýdyń tóte joly retinde qarastyrýymyz kerek ekenin aıtty.
«Túptep kelgende, Qazaqstandy órkendegen elge aınaldyrý – bárimizge ortaq mindet. Jańa ǵana sóz sóılegen ǵalymdar birqatar salmaqty oı aıtty. Bastamalardy muqııat saralaımyz. Utymdy usynystar mindetti túrde jumys barysynda eskeriledi.
Qazir ǵylymǵa arqa súıegen memleketter álemniń damý kóshin bastap tur. Biz sol elderdiń qataryna qosylý úshin ǵylymǵa aıryqsha mán berýimiz kerek, ıaǵnı ǵylymdy qarqyndy damýdyń tóte joly retinde qarastyrýymyz kerek.
Ahmet Baıtursynuly «Ozǵandarǵa jetý kerek, jetkenderden ozý kerek» degen eken. Budan bir ǵasyr buryn aıtylǵan sóz qazir, ásirese, ózekti.
Sońǵy jyldary ǵylym salasyn damytý úshin birshama jumys atqaryldy. Ulttyq ǵylym akademııasyna memlekettik mártebe berildi. Prezıdent janynan Ǵylym jáne tehnologııalar jónindegi ulttyq keńes quryldy», - dedi ol.