Sý tasqyny: halyqqa psıhologııalyq kómek usynatyn jedel shtab quryldy

<p>ASTANA. KAZINFORM &ndash; Topan sý astynda qalǵan óńirlerde halyqqa medıtsınalyq kómek kórsetilip jatyr. Bul týraly Densaýlyq saqtaý mınıstrliginiń resmı ókili Áıgerim Ýrazalıeva málim etti.</p>

«Sý tasqyny kezeńinde psıhologııalyq kómek kórsetý uıymdastyryldy. Osy maqsatta jedel shtab qurylyp, onda 30 psıholog turǵyndarǵa kómegin berip jatyr» - dedi Áıgerim Ýrazalıeva Ortalyq kommýnıkatsııalar qyzmeti alańynda ótken baspasóz máslıhatynda. 

Mınıstrlik ókiliniń aıtýynsha, júkti áıelder men balalardyń jaǵdaıy da erekshe nazarda. 

«Ótken táýlikte Atyraý oblysynda Qulsary qalasynan perzenthanadan 12 áıel, onyń ishinde 8 perzenthana men 5 júkti áıel tolyq merzimde medıtsınalyq uıymdarǵa evakýatsııalandy. 39-40 apta merzimindegi júkti áıelderdiń biri jedel medıtsınalyq járdem kóliginde tasymaldaý kezinde bosanǵan. Salmaǵy 3610 g, boıy 55 sm qyz dúnıege keldi. Qazirgi ýaqytta bosanǵan áıel men bala Beıneý aýdandyq aýrýhanasynda, olardyń jaǵdaıy qanaǵattanarlyq», - deıdi ol. 

Densaýlyq saqtaý mınıstrliginiń málimetinshe, sý tasqyny bastalǵannan beri barlyǵy 84 júkti áıel evakýatsııalandy. Onyń ishinde bosaný merzimi jaqyn 31 áıel aýrýhanaǵa jatqyzyldy.