Sý tasqyny: Forbes tizimindegi dáýlettiler men iri kompanııalar 100 mlrd teńge bóldi
Eske sala keteıik, Prezıdent Forbes tizimine kiretin iri kásipkerler ár oblysqa, aýdanǵa, eldi mekenge bekitiletini týraly aıtqan edi. Maqsat – sý tasqyny zardabyna ushyraǵan jandarǵa naqty qol ushyn sozý.
Osy oraıda Kazinform agenttigi tasqyn sý saldaryn joıýǵa Forbes tizimindegi baı-manaptardan kimder tartylýy múmkin ekendigine sholý jasady.
Endi sózden iske kóshken baı-qýattylarǵa kelsek, Tımýr Qulybaev Atyraý oblysyna kómek retinde 30 mlrd teńge bóledi. Qarajat turǵyn úı salýǵa jáne jóndeý jumystaryna, ınfraqurylymdyq obektilerdi qalpyna keltirýge, sondaı-aq sý tasqynynan zardap shekken halyqty qoldaýǵa jumsalady.
«Sý tasqynynan zardap shekken adamdarǵa janashyrlyq tanytamyn. Alǵashqy kúnnen bastap biz sý basqan óńirlerge kómek kórsetip kelemiz. Prezıdent Qasym-Jomart Toqaevtyń basshylyǵymen barlyq qıyndyqty birge jeńetinimizge senimdimin», - dedi Tımýr Qulybaev.
Sondaı-aq, Qazaqmys, KAZ Minerals, AltynAlmas, Qarajyra jáne RBK Bank kompanııalar toby sý tasqynynan zardap shekken qazaqstandyqtarǵa kómek kórsetý úshin qosymsha 40 mıllıard teńge bóledi. Bólingen qarajat ınfraqurylymdy qalpyna keltirýge jáne áleýmettik obektilerdi, ıaǵnı balabaqshalar, mektepter, aýrýhanalar, sondaı-aq turǵyn úıler salýǵa baǵyttalady.
Al, Kaspi.kz-tiń teń quryltaıshylary Vıacheslav Kım men Mıhaıl Lomtadze Soltústik Qazaqstan jáne Aqmola oblystaryna 20 mlrd teńge aýdarady. Aqsha óńirlerdi qalpyna keltirýge, sondaı-aq jańa turǵyn úı salýǵa jumsalady.
«Zardap shekken aımaqtarda bizdiń klıentter, seriktester men qyzmetkerler turady. Biz sý tasqynynyń alǵashqy kúninen bastap olarmen únemi baılanystamyz jáne jaǵdaımen tanyspyz. Kaspi.kz mobıldi qosymshasynda qaıyrymdylyq qor jınaýdy uıymdastyryp, «Biz birgemiz Qazaqstan» qoryna qutqarý tehnıkasyn, amýnıtsııany, janar-jaǵar maı jáne basqa da alǵashqy kómekti satyp alýǵa qarajat bólindi. Ókinishke qaraı, jaǵdaı birqatar aımaqta jaǵdaı áli de qıyn. Biz Prezıdenttiń bastamasyn qoldaýdy jáne osy qıyn sátte elge paıdaly bolýdy azamattyq mindetimiz dep sanaımyz», - dedi Mıhaıl Lomtadze.
Bolat Ótemuratov Aqtóbe oblysynyń turǵyndaryna qoldaý kórsetip, 10 mlrd teńge bóldi. Qarjy jańa turǵyn úıler salýǵa jumsalady.
«Sý basqan óńirlerdegi tótenshe jaǵdaıdy qaıǵyra qadaǵalap otyramyn. Apattyń aýqymy ósip barady, adamdarǵa shuǵyl kómek qajet. Biz barlyq kúsh-jigermen jáne qolda bar resýrstarmen qamtamasyz etýdi jalǵastyramyz. Prezıdent qıynshylyqqa tap bolǵan myńdaǵan otandasymyz úshin qaýipsizdik pen erteńgi kúnge degen senimdiliktiń kepili bola otyryp, aldyńǵy qatarda tur jáne Memleket basshysynyń sheshimderi árqashan bizdiń tarapymyzdan qoldaýǵa ıe bolady», - dedi Bolat Ótemuratov.