Sý tasqyny: evakýatsııalyq pýnkterge 700-ge jýyq medıtsına qyzmetkeri tartyldy

<p>ASTANA. KAZINFORM &ndash; QR Densaýlyq saqtaý mınıstrliginiń resmı ókili Áıgerim Orazalıeva sý tasqyny saldarynan zardap shekken óńirlerdiń turǵyndaryna medıtsınalyq kómek jasaýǵa qatysty túsinik berdi.</p>

«Evakýatsııalyq pýnktterde táýlik boıy medıtsınalyq beketter jumysyn jalǵastyryp jatyr. Onda 680 medıtsına qyzmetkeri, onyń ishinde 140 dáriger, sondaı-aq 67 psıholog kezekshilikte júr. Tótenshe jaǵdaı rejımi jarııalanǵan barlyq óńirde 421 júkti áıel baqylaýda tur, 86 áıel ambýlatorııalyq jáne statsıonarlyq deńgeıde medıtsınalyq kómek alyp otyr. Osy ýaqytqa deıin 377 áıel bosandy. Sý tasqyny bastalǵaly beri balalardyń kóbi Qostanaı, Aqtóbe jáne Mańǵystaý oblystarynda dúnıege keldi», - dedi Á.Orazalıeva Ortalyq kommýnıkatsııalar qyzmetindegi brıfıngide. 

Onyń aıtýynsha, sý tasqyny aımaqtarynan evakýatsııalanǵandar arasynan 674 adam túrli sozylmaly aýrýlarǵa shaldyqqan. Olar medıtsına qyzmetkerleriniń baqylaýyna alyndy. 

«Evakýatsııalyq pýnktterde 4 myńǵa jýyq bala bar, onyń ishinde 76 bala statsıonarlyq kómek jáne 47 bala ambýlatorııalyq em alyp jatyr. Budan basqa, osy aptada respýblıkalyq ǵylymı ortalyqtardan joǵary dárejeli beıindi mamandardyń, Densaýlyq saqtaý mınıstrligi mamandarynyń sý tasqyny aımaqtaryndaǵy turǵyndarǵa konsýltatsııalyq kómegi jáne medıtsına qyzmetkerlerin ádisnamalyq qoldaý úshin óńirlerge saparlary uıymdastyryldy», - dedi resmı ókil. 

Sonymen qatar ol epıdemıologııalyq jaǵdaı Densaýlyq saqtaý mınıstrliginiń erekshe baqylaýynda ekenin aıtty. Ýaqytsha ornalastyrý pýnktterindegi sanıtarııalyq-epıdemıologııalyq qyzmet mamandaryna talaptardy saqtaýǵa, tamaqtaný jaǵdaılaryn qadaǵalaýǵa, jappaı tamaqtan ýlanýdyń aldyn alýǵa erekshe nazar aýdarý tapsyryldy.