Sý tasqyny bolǵan SQO-nyń Bolshaıa Malyshka eldi mekeninde senbilik ótti

<p>PETROPAVL. KAZINFORM &ndash;&nbsp; Soltústik Qazaqstan oblysy Qyzyljar aýdanynda 18 eldi meken sý tasqynynan zardap shekti. Solardyń biri &ndash; Bolshaıa Malyshka aýyly. Sý ketkendikten turǵyndar, volonterler, memlekettik qyzmetshiler men eriktiler munda da senbilik uıymdastyryp jatyr.&nbsp;</p>

SQO ákimdiginiń málimetinshe, búgin Bolshaıa Malyshka eldi mekeninde kezekti senbilik ótti. Aýylda 327 úıge sý kirip, zaqymdanǵan.

«Ekinshi ret osyndaı aýqymdy aýdandyq senbilik ótkizemiz. Áleýmettik qorǵaý basqarmasynyń mamandaryna raqmet. 19 úıdi jónge keltirýge 70 adam kómektesedi. Olar jalǵyzilikti adamdardyń qıraǵan jıhazdaryn, turmystyq zattaryn shyǵarady. Іs-sharaǵa 15 tehnıka shyǵardyq. Bilim berý uıymdarynyń mamandary, aýdandyq ákimdikterdiń qyzmetshileri, sondaı-aq óz erkimen kelip kómektesip jatqandar bar. Segiz kóshede asfalt jabyndysy búlingen, ony qalpyna keltirý kerek. Avtomobıl joldary, jolaýshylar kóligi basqarmasy joldardy jóndeýge smeta jasaýǵa kómektesedi. Sýmen jabdyqtaý júıesin de qalpyna keltiremiz», - deıdi Qyzyljar aýdany ákiminiń orynbasary Alma Nurǵalıeva.

Eldi meken turǵyny Tatıana Petchenkonyń úıine óter joldy qoqys, eski qurylys materıaldary jaýyp tastaǵan. Senbilik barysynda onyń barlyǵy shyǵaryldy. Zeınetkerdiń aıtýynsha, ol Bolshaıa Malyshkada jarty ǵasyrdan astam turady, mundaı sý tasqynyn buryn kórmegen eken. 

Foto: SQO ákimdigi

«Meniń qalada eki múgedek qyzym bar, olar kómektese almaıdy. Aýyldy sý basqan kezde qyzymnyń úıinde turdym. Kómektesip jatqandaryna óte rızamyn, bizde meıirimdi jandar kóp», - deıdi Tatıana Petchenko.

Senbilikke bul kúni Bolshaıa Malyshkada barlyǵy 200-den astam adam shyqty. Sondaı-aq, Petropavldyń sý basqan shaǵyn aýdandaryn da qalpyna keltirý jumystary júrgizilip jatyr. Onda 11 jedel shtab ornalasqan, olardyń árqaısysyna bes mehanıkalandyrylǵan brıgada bekitilgen. 

Foto: SQO ákimdigi

Mehbrıgadalar búlingen múlikti qalpyna keltiredi, jóndeý jumystaryn júrgizedi, kósheler men aýla aýmaqtaryn qoqystan tazartady.

Buǵan deıin SQO-da tasqyn bastalǵaly 4,8 mln tekshe metr sý sorǵyzylǵanyn jazǵan edik.