Sý tasqyny: BQO-ǵa qaı elderden gýmanıtarlyq kómek jetkizildi

<p>ASTANA. KAZINFORM &ndash; Batys Qazaqstan oblysy ákiminiń baspasóz qyzmetiniń basshysy Erhan Tatken óńirge tasqynmen kúresý úshin barǵan áskerıler birtindep ózge aımaqtarǵa attanyp jatqanyn aıtty.</p>

«Óńirde jaǵdaı turaqtalyp keledi. Búgin tańdaǵy málimet boıynsha, Jaıyq ózenindegi sý deńgeıi 859 santımetr bolyp, 4 santımetr tústi. Mamandardyń aıtýynsha sý deńgeıi birtindep túse beredi.

Tasqyn bastalǵannan beri 13 980 adam evakýatsııalandy, onyń 5782-si — balalar. Búgingi tańda oblys aýmaǵyndaǵy 12 evakýatsııalyq pýnkti 2487 adam panalap otyr. Olarǵa qajetti zattar men azyq-túlikter ýaqytyly jetkizilýde. Turǵyndarǵa turaqty negizde medıtsınalyq baqylaý júrgizilip jatyr», - dedi Erhan Tatken Ortalyq kommýnıkatsııalar ortalyǵynda ótken brıfıngide.

Sondaı-aq, ol búginge deıin tasqynnan zardap shekken 1541 adamǵa 561 mln teńgeden astam qarjy tólengenin aıtty.

«Eldiń basqa oblystarynan jáne Qyrǵyzstan, Tájikstan, Daǵystan sııaqty elderden 337 mln teńgeniń gýmanıtarlyq kómegi kórsetildi.

Óńirdegi sý tasqynyna qarsy sharalarǵa 11 myńǵa jýyq adam, 2 myńnan astam tehnıka jumyldyryldy. Keshe olardyń ishinen 300-ge jýyq áskerı óńirdegi mıssııasyn aıaqtap, Oraldan Atyraýǵa jol tartty. Erteń de kúshtik qurylymdardyń birqatar qyzmetkeri basqa óńirlerge attanady.

Qazir jaǵdaı áli de baqylaýda. Aqjaıyq, Bórli, Báıterek, Terekti aýdandary men Oral qalasynda kezekshilik júrgizilip jatyr.

Jaıyq ózeniniń boıynda 142 shaqyrym damby turǵyzylǵan», - dedi baspasóz hatshysy.