Sý tasqyny: BQO-da turǵyndarǵa gýmanıtarlyq kómek kórsetilip jatyr

<p>ORAL. KAZINFORM &mdash; Batys Qazaqstan oblysynda sý tasqynynan zardap shekken turǵyndarǵa kómek kórsetý maqsatynda &laquo;Aqjaıyq&raquo; qoryna qajetti qarjy jınaqtalyp jatyr.</p>

Óńirde tótenshe jaǵdaı jarııalanýyna baılanysty úkimettik emes uıymdar, sonyń ishinde «Batys Qazaqstan oblystyq azamattyq alıansy» zańdy tulǵalar birlestigi «Aqjaıyq» qory arqyly qarajat jınaý týraly úndeý jarııalady. 

Foto: BQO máslıhaty

Oblystyq shtabtan berilgen málimetke qaraǵanda, 28 naýryz — 8 sáýir aralyǵynda bıznes ókilderinen 63,1 mln astam teńge, jeke adamdardan 226,5 myń teńge, memlekettik organdar men olarǵa qarasty uıym qyzmetkerleriniń bir kúndik jalaqysy esebinen 12,1 mln astam teńge jáne memlekettik emes uıymdardan 5,3 mln astam teńge tústi.

Qazirgi tańda «Aqjaıyq» qoryna 80,8 mln astam teńge jınaldy. Bul jumys jalǵasady. Sonymen qatar Astana qalasynda turatyn batysqazaqstandyqtar da bul isten shet qalmady.

«Kúni búgin 8,3 mln teńge jınaldy. Bastapqyda bul qarjyny batysqazaqstandyqtarǵa arnalǵan arnaıy qorǵa jiberý kózdelgen edi. Degenmen qazir gýmanıtarlyq kómek jiberý kerek degen pikir bar. Másele talqylanyp jatyr. Qalaı bolǵanda da járdem beriledi», — dedi Astanada turatyn Temirhan Meńdiǵalıev.

Foto: BQO máslıhaty

Sondaı-aq Oral qalasyndaǵy Dostyq úıinde assambleıa jastarynyń bastamasymen ashylǵan gýmanıtarlyq kómek kórsetý úshin qabyldaý pýnkti jumys jasaýda. 28 naýryzdan beri jalpy quny 54 mln teńgege azyq-túlik, jemis pen kókónis, dári-dármek, sanıtarlyq-gıgıenalyq quraldar, alǵashqy kerek-jaraq, kıim-keshek, turmystyq zattar, qurylys jáne basqa taýarlar jınaldy. Osy kúnge deıin gýmanıtarlyq kómek Syrym, Qaratóbe, Bórli, Terekti jáne Báıterek aýdandaryna jóneltildi.

Oǵan qosa Batys Qazaqstan oblysyna respýblıka óńirlerinen gýmanıtarlyq kómek jetkizilip jatyr.

«Ótken aptada áriptesim, Shymkent qalalyq máslıhatynyń tóraǵasy — «AMANAT» partııasy Shymkent qalalyq fılıalynyń tóraǵasy Bahadyr Narymbetov bastaǵan partııalastar atynan 20 tonnadan astam gýmkómek jiberilip, ony tótenshe rejım jarııalanǵan aýdandarǵa jónelttik. Keshe Astana qalalyq máslıhatynyń tóraǵasy Erlan Kanalımovtiń jetekshiligimen óńirimizge 28 tonnalyq gýmkómek keldi», — dedi BQO máslıhatynyń tóraǵasy Murat Muqaev.

Eske sala keteıik, budan buryn Oral qalasynlaǵy saıajaılardan turǵyndar kóshirilip jatqanyn jazǵan bolatynbyz.

Sondaı-aq Jaıyq ózenindegi sý deńgeıi Oral qalasy gıdrobeketinde 710 santımetrge jetti.