BQO-da 9 mektepte 3700-den astam oqýshy onlaın bilim alyp jatyr

<p>ORAL. KAZINFORM &mdash; &nbsp;BQO bilim basqarmasynyń baspasóz qyzmetinen málim etkenindeı, Bórli aýdanynda &ndash; 3, Terektide 6 mektep qashyqtan oqytý arqyly jumys jasaýda.</p>

«Qaratóbe aýdany Qorjyn aýylynyń 104 balasy aýdan ortalyǵyndaǵy Q.Jumalıev atyndaǵy mektep-gımnazııasynda dástúrli oqytý formatynda oqýda», - dep habarlady vedomstvodan.

Q.Jumalıev atyndaǵy Qaratóbe mektep-gımnazııasynyń dırektory Mırash Óteǵalıeva Aqqozy mektep-bóbekjaı-balabaqsha kesheninen 104 oqýshynyń ózi jetekshilik etetin bilim ordasy bazasynda oqytylyp jatqanyn jetkizdi.

Foto: Qaratóbe mektep-gımnazııasy

«Mektep aldy daıarlyq synyby (9 oqýshy), 1-4 synyp (43 shákirt) jáne 10-11 synyptar (13), barlyǵy 7 synyp jıyntyǵyna oqý josparynyń bólek bolýyna baılanysty Aqqozy mektebi muǵalimderi sabaq berýde. Al 5-9 synyptaǵy (48 oqýshy) 5 synyp jıyntyǵynda sabaq Qaratóbe mektep-gımnazııasynyń synyptarymen birge júrgizilýde. Barlyq synyp bir aýysymda bilim alady. Qorjyn aýylynan kelgen oqýshylar men ata-analary mektep janyndaǵy «Daryn mektep ınternatynda jatyp, ashanadan tórt mezgil tamaqtanýda. Jalpy, ınternatta 182 turǵyn ornalasqan. Búgin Batys Qazaqstan oblysyna jumys sapary kezinde Prezıdentimiz Qasym-Jomart Kemeluly Toqaevtyń mektebimizge kelip, evakýatsııalanǵan turǵyndarmen kezdeskeni úlken qýanysh ári demeý boldy», - dedi Kazinform tilshisine Mırash Óteǵalıeva.

Ata-analardyń aıtýynsha, Terekti aýdany Podstepnyı aýylyndaǵy barlyq mektepte sabaq onlaın oqytylýda.

Foto: Qaratóbe mektep-gımnazııasy

Podstepnyı jalpy bilim beretin qazaq mektebiniń dırektory Marat Syhovtyń sózine qaraǵanda, qazirgi tańda 1 106 shákirtke 100-ge jýyq muǵalim onlaın dáris berýde.

«Bizdiń mektep 2008 jyly paıdalanýǵa berilgen, 16 jyl boldy. Oıystaý jerge salynǵandyqtan, sýdyń bári mekteptiń ústimen ótti. Bıiktigi metrdeı sý basty. Ǵımaratty TJ qaıyǵymen kelip qarap júrdik. Qazirgi kezde sý sorý jumystary júrgizilýde, búgin keshke aıaqtaımyz ba dep otyrmyz. Keýip jatsa, dúısenbide offlaın oqytýdy bastaǵymyz keledi. Biraq úılerin sý basqan oqýshylar jan-jaqta, qalaǵa ketkenderi bar. Sondyqtan jartysyn onlaın oqytatyn shyǵarmyz», - dedi Marat Tóleýuly.

Eske sala keteıik, budan buryn Batys Qazaqstanda sýǵa ketken aýyldan turǵyndar tikushaqpen evakýatsııalanyp jatqanyn jazǵan bolatynbyz.

Sondaı-aq BQO-da Podstepnyı aýylynda sý basqan úıler sany eseptelip jatyr.