Sý tasqyny: Batys Qazaqstanda mamandar sibir jarasy kómindilerin tekserdi

<p>ORAL. KAZINFORM &mdash; Batysqazaqstandyq veterınar mamandar epıdemıologııalyq qyzmetpen birlesip Syrym aýdanyndaǵy sý basqan 3 sibir jarasy kómindisi ornalasqan jerdi tekserdi.</p>

BQO veterınarııa basqarmasynyń baspasóz qyzmetinen málim etkenindeı, betondalǵan sarkofagtar men qorshaýlardyń tutastyǵy buzylmaǵany anyqtaldy.

«Oral obaǵa qarsy stantsııasy» MM Jympıty bólimshesiniń mamandary osy kómindi oryndarynan topyraq synamalaryn aldy.

Basqarmadan túsken málimetke qaraǵanda, synamalar topyraqta sibir jarasy sporalarynyń bolýyn zertteý úshin «Veterınarııa jónindegi ulttyq referenttik ortalyqqa» jiberiletin bolady.

Sondaı-aq oblys boıynsha 8 mal qorymy sý astynda qalsa, sonyń úsheýi Bórli aýdanynda, bireýi Qaratóbede, úsheýi Syrymda, bireýi Terektide ornalasqan. Mal qorymdary juqpaly emes aýrýlardan ólgen janýarlardy kómýge arnalǵan. Sol sebepti mal qorymdaryn sý basqan jaǵdaıda da aýrý taralmaıdy.

«Qazirgi ýaqytta veterınar mamandar men jergilikti atqarýshy organdar mal qorymdaryn tekserip, sý tasqyny kezinde ólgen janýarlardyń ólekselerin kómýdi júrgizip jatyr. Barlyq is-sharalar júrgizilgennen keıin mal qorymdarynyń aýmaǵyn dezınfektsııalaý jumystary atqarylady. Sondaı-aq veterınar mamandar janýarlardyń asa qaýipti aýrýlaryna, mysaly, sibir jarasy men qarasanǵa, qutyrýǵa jáne basqa da aýrýlarǵa qarsy josparly profılaktıkalyq is-sharalar júrgizedi», - dep habarlady vedomstvodan.

Eske sala keteıik, budan buryn veterınarlardyń BQO-da tasqyn kezinde sibir jarasy kómindilerinen qaýip joq ekendigi týraly aıtqanyn jazǵan bolatynbyz.

Sondaı-aq sý basqan aýmaqtarda juqpaly aýrý juqtyrmaý úshin ne isteý kerek.

Batys Qazaqstanda mal ólekselerin joıý jumystary júrgizilip jatyr.