Sý tasqyny: Batys Qazaqstan oblysynda 10 eldi meken qatynassyz qaldy

<p>ORAL. KAZINFORM &mdash; Batys Qazaqstan oblysynda joldy sý shaıyp ketýine baılanysty Qaratóbe, Terekti jáne Shyńǵyrlaý aýdanynda 10 eldi meken kólik baılanysynsyz qaldy jáne oblystyq mańyzy bar 5 jol jabyldy.</p>

BQO polıtsııa departamentiniń baspasóz qyzmetinen málim etkenindeı, óńirde 63 joldy sý bassa, sonyń ishinde bireýi – respýblıkalyq, altaýy – oblystyq, 17-si – jergilikti mańyzy bar avtojoldar. Bul joldarda statsıonarlyq beketter ornatyldy.

«Oblys boıynsha sý tasqynynan qorǵaý jumysyna 703 polıtsııa qyzmetkeri 97 qyzmettik tehnıkamen jumyldyryldy. Qazirgi ýaqytta polıtsııa qyzmetkerleri turǵyndardy qaýipsiz jerge kóshirýdi jalǵastyrýda. Aýyldarda 3 771 adam kóshirilse, sonyń 1 575-i evakýatsııalyq beketke ornalastyrylyp, 2 192-si týysqandaryna jiberildi. Atalǵan beketterdi kúzetý jumystaryna 13 qyzmetker belgilendi. Evakýatsııalanǵan 49 aýyl turǵynynan ýaqytsha saqtaýdaǵy 68 azamattyq qarý tárkilendi. Barlyq qarý polıtsııa bólimderinde kúzetilýde. Sondaı-aq adamdar kóshirilgen eldi mekenderde azamattardyń múlkin qorǵaýǵa 90 qyzmetker (16 tehnıka) atsalysýda. Sonyń nátıjesinde bótenniń múlkin urlaý, tonaý derekteri tirkelgen joq», dep habarlady vedomstvodan. 

Foto: BQO polıtsııa departamenti

Departamentten málim etkenindeı, Tasqala,-Aqqýraı-Bolashaq, Jympıty-Qaratóbe (102-shaqyrymynda), Ańqaty-Saryómir, Aqsaı-Jympıty joldary jabyq.

Oǵan qosa qolaısyz aýa raıyna (qalyń tuman) jáne Podstepnyı-Elek jolynyń 35-shaqyrymynda asfalttyń jýylyp ketýine baılanysty apattyń saldaryn joıý úshin 1 sáýir kúni saǵat 21.00-den bastap barlyq kólik quraldary úshin qozǵalys toqtatyldy. Terekti aýylyna 2 kılometrdeı jetpeıtin tusta jolda shuńqyr paıda boldy. 

Osy atalǵan qaýipti aımaqtarda polıtsııa qyzmetkerleri táýlik boıy baqylaý jasaýda.

«QazAvtoJol» UK» AQ BQO fılıalynyń málimeti boıynsha tumanǵa baılanysty 1 sáýir kúni saǵat 21.45-ten bastap respýblıkalyq mańyzy bar Oral-Tasqala-RF shekarasy (4-104 km) jáne saǵat 22.45-ten bastap Oral-Býzýlýk-RF shekarasy (5-33 km) jolynda barlyq kólik túrleri úshin shekteý engizildi. 

Foto: BQO polıtsııa departamenti

Eske sala keteıik, budan buryn BQO-da Podstepnyı aýylynda sý basqan úıler sany eseptelip jatyrǵanyn jazǵan bolatynbyz.

Sondaı-aq sý tasqynyna baılanysty Batys Qazaqstan oblysynda tótenshe jaǵdaı jarııalandy.