Sý tasqyny basqan óńirlerde janar-jaǵarmaı jetkilikti me

<p>ASTANA. KAZINFORM &ndash; Energetıka mınıstrligi sý tasqyny basqan óńirlerde benzın men dızel otyny jetkilikti ekendigin málim etti.</p>

«Halyqtyq» AI-92 benzıni men dızel otynynyń baǵasy eldiń barlyq aýmaǵynda, birinshi kezekte sý tasqynynan zardap shekken óńirlerde birdeı deńgeıde qalyp otyr. Sý tasqynynan zardap shekken óńirlerde arnaıy tehnıka úshin dızel otynynyń qorlary jetkilikti jáne táýlik boıy ári úzdiksiz toltyrylady», — dedi mınıstrlikten. 

Vedomstvonyń naqtylaýynsha, sý tasqyny qaýpi áli de joǵary 5 oblysta dızel otynyń mynadaı kólemi bar:

— Atyraý oblysy — 48 myń tonna (43 kúnge jetkilikti);

— BQO — 16 myń tonna (40 kún);

— SQO — 51 myń tonna (83 kún);

— ShQO — 20 myń tonna (26 kún);

— Qostanaı oblysy — 47 myń tonna (41 kún).

Sondaı-aq, bul óńirler avtobenzındermen (5-38 kún) jáne avıaotynmen (5-7 kún) qamtamasyz etilgen. Olar da úzdiksiz toltyrylady.

«Energetıka mınıstrligi janar-jaǵarmaı boıynsha mamandandyrylǵan Respýblıkalyq qyzmet qurdy. Kez kelgen óńirdegi tótenshe jaǵdaıdy joıýǵa tartylǵan Qorǵanys jáne Tótenshe jaǵdaılar mınıstrlikteriniń, ákimdikterdiń bólimsheleri basym tártippen jáne táýlik boıy qamtamasyz etiledi. Tótenshe jaǵdaı aımaqtarynyń qashyqtyǵyna baılanysty 1-18 saǵat ishinde janar-jaǵarmaı jetkizý úshin 111 avtotsısterna jumyldyryldy nemese jedel daıyndyqta (qajet bolǵan jaǵdaıda avtotsısternalar sany ulǵaıtylady) tur. Mınıstrlik janar-jaǵarmaı jetkizý jónindegi biryńǵaı operator («QazMunaıGaz-Aero / QMGA» JShS) jelisi boıynsha TJ rejıminde jumys isteıtin Atyraý oblysy men Atyraý qalasynyń ákimdikterine qosymsha 371 myń lıtr dızel otyny jáne 24 myń lıtr AI-92 avtobenzın bóldi. Qajet bolǵan jaǵdaıda elimizdiń kez kelgen óńirine janar-jaǵarmaı men avtotsısternanyń qosymsha kólemi bólinedi», — dedi vedomstvodan.

Jalpy, qazirgi ýaqytta el boıynsha janar-jaǵarmaıdyń mynadaı qory bar:

— avtobenzınder — 480 myń tonna (33 kún);

— avıaotyn — 107 myń tonna (56 kún);

— dızel otyny — 610 myń tonna (39 kún);

JJM qorlary táýlik boıy toltyrylady jáne jóneltiledi.