Sý tasqyny: azyq-túlik baǵasy ósse qaıda habarlasý kerek

<p>ASTANA. KAZINFORM &ndash; Sý tasyǵan óńirlerdegi saýda nysandarynda kóshpeli revızııa júrgizilip, azyq-túlik pen qajetti taýarlar qorlary tekserildi. Bul týraly Saýda jáne ıntergratsııa mınıstrliginiń resmı ókili Álııa Abdrahmanova málim etti.</p>

«Ulttyq statıstıka bıýrosynyń aqparatynyna sáıkes, barlyq óńirde áleýmettik azyq-túlik baǵasynyń ósýi baıqalmaıdy. Mınıstrlik sý tasqynynan zardap shekken 10 oblysta azyq-túlik taýarlary, onyń ishinde áleýmettik mańyzy bar azyq túlikpen qamtý jaǵdaıyn turaqty baqylaýda ustap otyr. Saýda nysandarynda kóshpeli revızııa júrgizildi, azyq-túlik jáne eń qajetti taýarlar qorlary tekserildi», - dedi Álııa Abdrahmanova Ortalyq kommýnıkatsııalar qyzmeti alańynda ótken baspasóz máslıhatynda. 

Mınıstrliktiń resmı ókili keltirgen aldyn ala derekter boıynsha sý basqan óńirlerde 80 saýda nysany zardap shekti. (Pavlodar oblysynda - 1, Qostanaı oblysynda - 22, Aqtóbe oblysynda - 9, Atyraý oblysynda - 35, Batys Qazaqstan oblysynda - 13 nysan). Qazir zalal somasy naqtylanýda. Qalǵan óńirlerde jaǵdaı turaqty.

«Mınıstrlik turaqty negizde saýda jelilerimen, úı janyndaǵy dúkendermen jáne kóterme saýda núktelerimen ózara is-qımyl jasaıdy. Kún saıyn azyq-túlik baǵasyna monıtorıng júrgiziledi. Sonymen qatar iri saýda jelilerimen baǵa turaqtylyǵyn qamtamasyz etý baǵytynda túsindirý jumystary júrgizildi. Taýar, azyq-túlik baǵasynyń ósý faktileri anyqtalǵan jaǵdaıda 8(7172)74-37-35 nómirine habarlasýyńyzdy suraımyz», - deıdi ol.