Sý tasqyny. Atbasarda 200 januıany kóshirýge bólingen 300 mln teńge qarajat qoldy bolǵan
Aqmola oblysynyń arnaıy prokýrorlary 300 mln teńgeden astam qarajatty jymqyrǵany úshin Atbasar aýdanynyń ákimdigine qarasty qurylys bólimi, «Prestıj Stroı 7» jáne «Fýndamental» JShS-niń basshylaryna qatysty sotqa deıingi tergep-tekserýdi aıaqtady.
— Atalǵan qarajat 2021 jyly Úkimet rezervinen Atbasar aýdanynda sý tasqyny aımaǵynda turatyn 200 januıany kóshirý úshin eki 100 páterli úılerdi salýǵa bólingen. Kúdiktilerdiń áreketteri asa iri kólemde jymqyrý — talan-tarajǵa salý, ıaǵnı Qazaqstan Respýblıkasy Qylmystyq kodeksiniń 189-baby 4-bóligi boıynsha saralandy. Kórsetilgen bap boıynsha múlkin tárkileýmen qosa, 12 jylǵa deıin bas bostandyǵynan aıyrý jazasy kózdelgen. Eki kúdikti sot sanktsııasymen kúzetpen ustalsa, olardyń úshinshi seriktesi úıqamaqqa alyndy, — delingen vedomstvo habarlamasynda.
Tergeý barysynda Almaty, Astana qalalarynda qylmystyq jolmen alynǵan kommertsııalyq jyljymaıtyn múlik, arnaıy tehnıka, qurylys qurylǵylary anyqtaldy, sondaı-aq banktik shottarda 50 mln teńgeden astam aqshalaı qarajat tabyldy. Bul rette tyıym salynǵan múliktiń quny 335 mln teńgeden asa somaǵa baǵalandy. Prokýrorlar atalǵan múliktiń bir bóligi jalǵa berilip, qylmystyq jolmen paıda túsirilgenin anyqtady. Sol sebepti, bir kúdiktiniń áreketi qylmystyq jolmen alynǵan aqshany jáne ózge múlikti zańdastyrý (jylystatý), ıaǵnı Qazaqstan Respýblıkasy Qylmystyq kodeksiniń 218-baby 3-bóligi boıynsha qosymsha saralandy. Bul bap boıynsha múlkin tárkileýmen qosa, 10 jylǵa deıin bas bostandyǵynan aıyrý jazasy kózdelgen.
Qazir qylmystyq protseske qatysýshylar qylmystyq is materıaldarymen tanysyp jatyr. Sońǵy núkteni is boıynsha sot qoıatyn bolady.
Buǵan deıin Prezıdent Aýyl sharýashylyǵy qyzmetkerleriniń birinshi forýmynda kóktemgi sý tasqynynan zardap shekken 17 myńnan astam otbasynyń baspana máselesi sheshilgenin habarlady.