Almaty oblysynda sý tasqynyna qatysty jaǵdaı turaqty — Nurjan Qudaıbergenov
«Almaty oblysynda sý tasqyny jaǵdaıy turaqty, eldi mekender men joldardy jáne basqa nysandardy sý basý jaǵdaıy bolǵan joq. Ózen arnalary turaqty tranızttik rejımde júrip jatyr. Jaýyn-shashynnyń kóptigine baılanysty Almaty oblysynda jalpy kóktemgi sý tasý kezinde tek qana 35 úıdiń aýlasyna sý kirdi. Biraq jumystar der kezinde júrgizilip, sýdy turǵyn úıler aýlasynan shyǵardyq», - dedi N. Qudaıbergenov Ortalyq kommýnıkatsııalar qyzmetinde ótken baspasóz máslıhatynda.
Jalpy Almaty oblysynda 310 gıdrotehnıkalyq qurylys bar. Atap aıtqanda, «Qapshaǵaı», «Kúrti», «Bartoǵaı» jáne «Bestóbe» sııaqty sý qoımalary bar. Búginde sý toltyrý rejımderi shtatty túrde júrgizilýde. Toltyrý kórsetkishteri 44 paıyzdan 99 paıyzǵa deıin jetedi. Barlyǵy baqylaýda.
«2024 jylǵy sý tasqyny kezeńine daıyndyq máselesi ótken jylǵy komıssııa otyrysynda talqylanǵan bolatyn. Jumystar der kezinde atqarylyp, bıyl sý tasqyny kezeńinde eshqandaı oqys oqıǵa bolǵan joq. Tek qana Almaty oblysy boıynsha Іle aýdanynda Voroshılov sý qoımasynyń aǵytylýy tirkeldi. Jedel oblystyq shtab jınalysy ótip, qaýiptiń aldyn alyp, sý qoımasy mańyndaǵy aýyldardan sý shyǵarý jumystary tolyǵymen atqaryldy. Áskerı bólimder, aýyl turǵyndary jáne eriktiler ýaqytyly jumys istep, jaǵalaýdy bekitýiniń arqasynda birde-bir úıge sý kirgen joq», - dedi N. Qudaıbergenov.
Spıkerdiń aıtýynsha, jyl basynan bastap kóktemge deıin eldi mekenderden 3,7 myń m3 qar shyǵaryldy. Odan bólek, avtojoldar astyndaǵy 157 sý ótkizý qubyry, temir joldar astyndaǵy 7 qubyr, 347 shaqyrym aryq jelisi, 156,9 shaqyrym arna jáne 82,1 shaqyrym sý burý kanaldary tazartylǵan.
«Bıylǵy jylǵa oblys ákimdiginiń rezervinde 2 mlrd 16 mln teńge qarastyrylǵan. Aýmaqtyq TJ departamentine aldyn alý jumystaryn júrgizý úshin 110,6 mln teńge bólingen. Sý tasqyny jaǵdaıy asqynǵan jaǵdaıda 1326 adam, 471 tehnıka, 126 motopompa, 29 júzý quraldary, 35 460 qapshyq qarastyrylǵan oblystyń azamattyq qorǵaý qyzmetteriniń kúshteri men quraldar toptamasy daıyn. Sonymen qatar, oblysta sý tasqynynan zardap shekken óńirlerge gýmanıtarlyq kómek kórsetý úshin «Kúshimiz-birlikte» volonterlar shtaby quryldy. Búginde Batys Qazaqstan oblysyna 130 tonna gýmmanıtarlyq kómek jınaqtalyp, jóneltildi. Kómektiń basym bóligi - kúndelikti turmysqa qajetti zattar men azyq-túlik, kıim-keshek, tósek-oryn jabdyqtary, sondaı-aq turmystyq tehnıka», - dedi N. Qudaıbergenov.