Sý tasqyny: Aqtóbeniń Temir aýdanynda 21 otbasy baspanaly boldy

<p>AQTÓBE. KAZINFORM - Temir aýdany Qumsaı aýylynda 21 otbasy baspanaly boldy. Jańa úıler bıik jerden jáne turǵyndar ótinishimen eski aýladan salyndy.</p>

Jańa úılerdiń aýdany - 80 sharshy metr. Úsh bólmeli úılerde ınjenerlik jelilerdiń bári qosylǵan. Baspanalardyń kiltin saltanatty túrde tabystaý rásimine oblystyq jáne aýdandyq máslıhat depýtattary, Temir aýdanynyń ákimi Salamat Amanbaev, merdiger kompanııa ókilderi qatysyp, qumsaılyqtardy quttyqtady. Ár jańa qonys ıesine turmystyq tehnıkalar tartý etildi.
-Kóktemgi sý tasqyny kezinde osy aýylǵa kelgenimizde, halyqtyń kóńilindegi kirbiń men janaıqaıyn kórgen edik. Qanshama turǵyn baspanasyz qaldy. Osyndaı jaǵdaı elimizdiń aımaqtarynda da boldy. Sol kezde Memleket basshysy, oblys ákimi, aýdan ákimi halyqtyń ortasynda bola bildi. Halyqtyń kókeıinde «biz ne isteımiz, qaıda baramyz, bolashaǵym ne bolady» degen úlken suraq bolǵany ras. Qazir, mine, qýanyshty kúnge jetip, jańa turǵyn úıge kóshti, - dedi Aqtóbe oblystyq máslıhat depýtaty Boran Іzbasov.

Foto: Aqtóbe oblysy ákiminiń baspasóz qyzmeti

Aqtóbe oblysy ákiminiń baspasóz qyzmetiniń habarlaýynsha, Temir aýdanynda kóktemgi sý tasqyny kezinde Shubarqudyq, Qumsaı, Eńbekshi, Shıtúbek aýyldaryndaǵy 98 turǵyn úı sýǵa ketti.

Foto: Aqtóbe oblysy ákiminiń baspasóz qyzmeti

Júrgizilgen tehnıkalyq tekserý jáne baǵalaý jumystarynyń nátıjesinde 224 mln teńgeden astam qarjy bólinip, 41 úı jóndeldi. Sondaı-aq, úıleri apattyq dep tanylǵan 36 otbasyǵa daıyn úı satyp alynsa, 21 qumsaılyqqa jańa úı salyndy. 63 otbasy búlingen jyljymaly múlikteri úshin 26 mln teńge aqshalaı kómek aldy. Qurylys jumystaryn «Muǵaljar Stroı» JShS jáne «Taf Company» JShS júrgizdi.

Foto: Aqtóbe oblysy ákiminiń baspasóz qyzmeti

- Kóktemgi sý tasqynynyń qarqyny qatty ári sý kólemi kóp boldy. Óńirde bolǵan tótenshe jaǵdaı kezinde sý tasqynynyń saldaryn joıý jáne oǵan qarsy is-sharalardy ótkizýge belsendi atsalysyp, shydamdylyq tanytqandaryńyzǵa alǵysymdy bildiremin. Búgingi qýanyshtaryńyz qutty bolsyn, jańa shańyraqtaryńyzǵa qut-bereke, birlik tileımin,- dedi Temir aýdanynyń ákimi Salamat Amanbaev.

Eske salsaq, buǵan deıin Áıteke bı, Oıyl, Qobda, Yrǵyz jáne Muǵaljar aýdandarynda sý tasqynynan zardap shekkenderge salynǵan 350 jańa úıdiń kilti tabystaldy. 

Qalǵan 150 baspananyń qurylysy aıaqtalýǵa jaqyn. Budan bólek 513 otbasy daıyn úıge kóshti.