Sý tasqyny: Aqtóbeniń Oıyl aýdanynda 21 úı qoldanysqa berildi
Oıyl aýdanyndaǵy qurylys jumystaryna ERG kompanııalar toby qarjy bóldi. Qarjy «Qamqor Aqtóbe-2024» qory arqyly aýdaryldy. Aýdan boıynsha barlyǵy 172 úıdi jańadan salynyp jatyr. Ol Oıylmen qatar Qaratal, Aqkemer, Kemer, Aqjar jáne Bestamaq aýyldarynda ornalasqan. Búgin Oıyldan Ekpetal jáne Qaratal aýyldarynń turǵyndary úı aldy.
«Oıyl aýdany ortalyǵyna jaqyn ornalasqan Ekpetal aýylynyń turǵynymyn. Kóktemde sý bas qaýpi tóngen kezde bizdi ortalyqqa ákeldi. Sodan áýletimizdiń birneshe otbasyna yńǵaıly bolsyn dep páter jaldap turǵan jaıymyz bar. Árıne, ósip-óngen aýylymyzdy, úıimizdi qımaımyz. Qazir de kóńilim bosap tur. Úıimiz bolmaı, úıindige aınalǵanda qınalǵanymyz ras. Tipti bir aýyldyń týmasy bolyp, ortaq chatymyzdy da jappaı, habarlasyp otyramyz. Bizge óz aýylymyz ystyq. Degenmen jańa ortaǵa úırenip jatyrmyz», - dedi Oıyl aýdanynyń turǵyny Ǵalııa Qarabalına.
Jańa úılerdiń kiltin tabystaýǵa jergilikti ákimdikpen qatar demeýshiler de qatysty. Turǵyndarǵa túrli turmystyq tehnıka syıǵa berildi.
«Sý tasqyny kezinde jergilikti kásipkerlermen qatar elimizdiń túkpir-túkpirinen kómek keldi. Qurylys júrgizgen, demeýshilik etken bar qoldaýshyǵa alǵys aıtamyz. Memleket basshysynyń tapsyrmasyna sáıkes barlyq jumys merziminde oryndalyp jatyr. Turǵyn úıler qurylysynda jerlesterimizdiń jaılylyǵy men qaýipsizdigin qamtamasyz etý úshin sapaǵa erekshe nazar aýdarylǵanyn atap ótkim keledi», - dedi Oıyl aýdanynyń ákimi Asqar Qazybaev.
Aıta keteıik, buǵan deıin Aqtóbe oblysy Oıyl aýdany Kemer aýylynda 2 turǵyn jańa baspanaǵa qonys aýdardy. Jalpy Oıyl aýdanynda 328 úıge sý kirip, onyń 307-si apatty dep tanyldy. Aýdanda barlyǵy 176 úı salýǵa sheshim qabyldanǵan.