Sý tasqyny: Aqtóbeniń Nura aýylynda jańa úılerdiń ıeleri jerebe arqyly anyqtaldy
Aqtóbe oblysy boıynsha Ekpetal aýyly túgel aýdan ortalyǵyna kóshirildi. Sóıtip Oıyl aýdanyndaǵy bir aýyl joıyldy. Al Yrǵyz aýdanyndaǵy Nura aýyly túgel Saryoba jerine kóshirildi. Qazirgi kezde munda 63 úı salynyp jatyr. Ákimdik qaı úıdiń kıimge tıesili ekenin anyqtaý úshin jerebe ótkizdi.
- Nura aýylynyń turǵyndary aldyn ala jerebe arqyly kimge qaı úı tıesili ekenin anyqtaý jóninde óz taraptarynan usynys bildirgen bolatyn. Aýdandaǵy «Araı» mádenıet úıinde Nura aýylynyń turǵyndaryn jınap, jerebe rásimi ótti. Nátıjesinde 63 turǵynnyń úıleri naqtylandy. Endi turǵyndar salynyp jatqan óz úıleriniń qorasyn salýǵa kirisedi. Qazirgi tańda Nura aýylynda 11 merdiger jumys istep jatyr. 63 úıdiń irgetasy quıylyp, qabyrǵalary qalandy. Qazir tóbesi jabylyp jatyr. Jalpy qurylys jumystaryna 143 adam tartylǵan. Sonymen birge syrtqy elektr jelileri men sý jelilerin júrgizýshi merdigerler de óz baǵyttary boıynsha jumystar júrgizýde, - dep habarlady Yrǵyz aýdanynyń ákimdigi.
Yrǵyz aýdanynyń ákimi Nurlan Qyzbergenovtiń aıtýynsha, aýdan ortalyǵynda 51, Nurada 63, Mamyrda 6 úı salynyp jatyr.
- Nura aýylynda 60 oryndyq mektep-balabaqsha, medıtsınalyq pýnkt qurylysy júrip jatyr. Baılanys operatorlar da bar. Turǵyndardyń qora salyp, qysqa daıyndalǵysy keletinin túsinemiz. Biraq qurylys júrip jatqan jerde aýyr tehnıka kóp, gaz, sý, jaryq tartylyp jatyr. Sondyqtan qurylys aıaqtalǵannan keıin qora salýǵa kirisseńizder dep suraımyn,- dedi Yrǵyz aýdanynyń ákimi Nurlan Qyzbergenov óz úndeýinde.
Eske salsaq, bıyl kóktemde Nura aýylyn sý basty. Ondaǵy barlyq úıge sý kirdi. Jergilikti atqarýshy organ men halyq birigip, aýyldy jańa jerge kóshirýge sheshim qabyldady.