Sý tasqyny: Aqtóbeniń Muǵaljar aýdanynda turǵyn úı qurylysy aıaqtaldy

<p>AQTÓBE. KAZINFORM - Muǵaljar aýdany Birlik jáne Jaǵabulaq aýyldarynda úı qurylysy aıaqtaldy. Turǵyndar birer kúnnen soń qonystanady.</p>

Kóktemgi sý tasqyny kezinde Muǵaljar aýdanynda 76 úıge sý kirdi. Barlyǵy 55 otbasy daıyn úı satyp alýdy jón kórdi. Al 7 úı jóndeldi. Birlik aýylynan 5, Jaǵabulaqtan 9 otbasy jańa úı salyp berýdi suraǵan.

Foto: Aqtóbe oblysy ákimdiginiń baspasóz qyzmeti

- Jaǵabulaqta «Aılın Stroı Proekt» JShS 9 jańa úıdiń qurylys jumystaryn aıaqtaýǵa jaqyn. Bir-eki kúnde baspanalar paıdalanýǵa beriledi. Turǵyndarmen birge jańa úılerdi qarap shyqqan Ashat Shaharov merdigerler men aýdan ákimdigine úılerge barlyq kommýnıkatsııany merziminde jetkizýdi tapsyrdy,- dep habarlady Aqtóbe oblysy ákiminiń baspasóz qyzmeti.

Al Birlik aýylynda 5 úıdiń úsheýi tolyqtaı paıdalanýǵa daıyn. Ekeýinde ishki árleý jumystary júrip jatyr. Bul úılerdi de «Aılın Stroı Proekt» JShS saldy. Merdiger uıym ókilderi jaqyn arada barlyq jumystardy aıaqtaýǵa ýáde berip otyr.

Foto: Aqtóbe oblysy ákimdiginiń baspasóz qyzmeti

- Tabıǵı apat kezinde úıim qulady, barlyq múlik sýda qaldy. Biraz ýaqyt baspana jaldadyq. Jańa baspanamyz daıyn, kóp uzamaı kóship kelemiz. Barlyq zardap shekkenderge kómek pen qoldaý kórsetken jerlesterge rahmet. Endi mundaı oqıǵalar bolmasyn, - dedi Birlik aýylynyń turǵyny Amanǵalı Ramazanov.

Aıta keteıik, jańa úı salynǵan aýmaqqa asfalt tóseldi. Ár úıge gaz, sý tartylyp, jaryq qosylady. Sonymen birge turmystyq tehnıka da bar.

Foto: Aqtóbe oblysy ákimdiginiń baspasóz qyzmeti

- Merdigerler jaqsy jumys istep, úılerdiń qurylysyn aıaqtap jatyr. Memleket tarapynan sýy, gazy, jaryǵy tartylady. Jol salynyp, turǵyn úı sektorynyń aýmaǵy abattandyrylady. Endi tek úıdi qabyldap alý kerek,- dedi oblys ákimi Ashat Shaharov.

Aıta keteıik, sý tasqyny kezinde Muǵaljar aýdanynda 3 kommertsııalyq nysan men 8 sharýashylyqta shyǵyn tirkeldi.