Sý tasqyny: Aqtóbeniń Kemer aýylynda úı qurylysy aıaqtaldy

<p>AQTÓBE. KAZINFORM &ndash; Aqtóbe oblysy Oıyl aýdany Kemer aýylynda 2 turǵyn jańa baspanaǵa qonys aýdardy. Mundaǵy qurylys maýsymda bastalyp, 2 aı 10 kúnde aıaqtaldy.</p>

Saraljyń aýyldyq okrýginiń ákimi Marat Tájiǵalıevtiń aıtýynsha, tasqyn kezinde Bestamaq, Aqkemer jáne Kemer aýyldarynda barlyǵy 23 úıge sý kirip, barlyǵy jaramsyz bolyp qaldy.

Foto: Aqtóbe oblysy ákiminiń baspasóz qyzmeti.

Maýsymda úsh aýylda qurylys jumysy bastalyp, Kemer aýylynyń bir, Aqkemer aýylynyń 2 otbasy aýdan ortalyǵyna kóshýge sheshim qabyldaǵan. Búginde úsh aýylda barlyǵy 20 úı salyndy. 

- Aqkmer aýylynda 16 úıdiń qurylysy júrip jatyr. Ony keler aptada qoldanys beremiz. Bestamaq aýylyndaǵy úıdi senbi kúni aıaqtap, ıelerine kiltti tabystaımyz. Al Kemer aýylynda eki otbasy jańa úıge qonystandy. Aýyldaǵy adamdar birjolǵy tólemdi aldy, múlik shyǵyny óteldi. Aýylda úıdi jóndegen eshkim joq. Sý kirgen úıler turýǵa jaramyz bolyp qaldy, - Saraljyń aýyldyq okrýginiń ákimi Marat Tájiǵalıev. 

Baspanaly bolǵan Kemer aýylynyń turǵyny Bekbol Janııazovtyń aıtýynsha, sý úıge 28 naýryz kúni kirgen. Sol kúni-aq onyń baspanasy qulap qaldy.

- Biz úıimiz jaramsyz bolyp qalǵan soń páter jaldap turdyq. Ózim aýylda sý sharýashylyǵynda slesar bolyp jumys isteımin. Sondyqtan úıdiń de osy aýylda salynǵanyn qaladym. Bizge keshe baspanamyzdyń kiltin tabys etti. Qurylys jumystary kezinde kúnde qarap, kórip júrdim. Úıim jaqsy, qurylysy kóńilimnen shyqty. Burynǵy úıimniń de aýdany 80 sharshy metrdeı bolatyn. Ol biraq samannan salynǵan, - dedi Bekbol Janııazov.

Sondaı-aq onyń kórshisi Darhan Hasenov te baspanaly boldy. 

- Otbasynda úsh janbyz. Qaladan aýylǵa 2012 jyly kóship kelip, bir jyldan soń sharýashylyq ashtym. Asyl tuqymdy iri qara baǵyp otyrmyn. Aýylǵa tún ishinde sý kirip, tek bir kıimmen ǵana shyǵyp úlgerdik. Sodan týma-týystyń, tanystyń úıin jaǵalap, sharýashylyq basyna kóship kettik. Qazir de sondamyz. Jańa úı keshe ǵana berildi. Qurylysy jaqsy júrgizilgen, sapaly. Bıyl elektr togy arqyly jylytamyz, al keler jyly gaz beriledi dep úmittenip otyrmyz, - dedi aýyl turǵyny Darhan Hasenov.

Tasqyn kezinde 17 bas iri qara men jylqy shyǵyny boldy. Sharýa shyǵynynyń bir bóligi ótelgen.

Eske salsaq, Oıyl aýdanynda 328 úıge sý kirip, onyń 307-si apatty dep tanyldy. Aýdanda barlyǵy 176 úı salynyp jatyr.