Sý tasqyny: Aqtóbedegi qoǵamdyq qorǵa 600 mln teńgege jýyq qarjy jınaldy
Aqtóbe oblysynda qazirgi kezde tehnıkalyq baǵalaý, múliktiń shyǵyn qunyn esepteý komıssııasy jumys istep jatyr. Shyǵyn tótenshe jaǵdaı negizinde óteledi. Sonymen birge qujattary durys rásimdelmegen, sý tasqyny kezinde shyǵynǵa batqan adamdarǵa kómek «Qamqor – Aqtóbe 2024» qoǵamdyq qory arqyly beriledi. Búginde qorǵa 600 mln teńgege jýyq qarjy bólindi.
«Aqtóbe qalasy aýmaǵyndaǵy saıajaı úıleriniń keıbirinde qujat durys rásimdelmegen. Bul shyǵyndy óteý kezinde qıyndyq týdyrady. Qorǵa túsken qarjy osy máselelerge sheshýge baǵyttalmaq. Qorǵa 581 991 000 teńge qarjy tústi. Kóbin ekinshi deńgeıli bank aýdardy. Sonymen birge iri kásiporyndar 50 mln teńgeden qarjy bóldi. Qarapaıym turǵyndardyń da úlesi zor», - dedi «Qamqor – Aqtóbe 2024» qoǵamdyq qorynyń múshesi Qýantqan Álimov.
Qoǵamdyq qorǵa oblystyq máslıhat depýtaty, qoǵamdyq keńes, BAQ ókilderi men qoǵam belsendileri múshe. Qor músheleri kásiporyn, óndiris oryndary basshylarymen, kásipkerlermen kezdesip, kómek kórsetýge shaqyrdy. Sonymen birge iri munaı-gaz, taý-ken kompanııalaryna suranys hat jiberdi.
«Bıyl tabıǵı apattyń aýqymy úlken. Sondyqtan qoǵamdyq qor quryp, ony ashyq júrgizý birqatar problemany aqyldasa otyryp sheshýge múmkindik beredi. Birinshi orynda – baspana máselesi. Qor da osy jaǵyna basymdyq beredi. Eń birinshi «Aqtóbe» fýtbol klýby oıynnan tústen qarjyny berip otyr. Al Dımash Qudaıbergenniń qarjysy Aqtóbeniń esepshotyna emes, respýblıkalyq qorǵa tústi. Ázirge qorǵa túsken qarjynyń bir tıyny da jumsalmady. Ony bólý kezinde komıssııa sheshim qabyldaıdy», - dedi qor múshesi Jańalyq Ahash.