Sý tasqyny: Aqtóbede elektr jelisin qalpyna keltirý úshin 500-den astam baǵana aýystyryldy

<p>AQTÓBE. KAZINFORM &ndash; Kóktemgi sý tasqyny kezinde Aqtóbe oblysynda 51 aýyl jaryqsyz qaldy. Qalpyna keltirý shyǵynyna 202 mln teńgeden astam qarjy qajet boldy. Qazirgi kezde 500-den astam baǵana aýystyrylǵan. Aqtóbe oblysynyń energetıka jáne turǵyn úı-kommýnaldyq sharýashylyǵy basqarmasy Kazinform tilshisiniń sý tasqynynan keıingi qalpyna keltirý jumystary týraly saýalyna jaýap berdi.</p>

«Energosıstema» JShS-niń aqparatyna súıengen basqarmanyń habarlaýynsha, Aqtóbe qalasy men Aqtóbe oblysynyń aýdandarynda 61 apattyq ajyratý tirkelgen. Baǵana qulap, elektr aıyrǵysh qurylǵy buzylǵanda jáne sym úzilgende 23 ret tok ajyratyldy. Bul qaýipsizdik sharasy boldy. 

– 2024 jyldyń 26 naýryzynan bastap 19 sáýirine deıin 51 eldimeken, 5 myńnan astam tutynýshy elektr energııasynan ajyratyldy. Apattardy joıý jáne qalpyna keltirý jumystary úshin 120-dan astam apattyq-qalpyna keltirý brıgadasy, 186 arnaıy tehnıka men avtokólik jumyldyryldy. Barlyq jumystar qysqa merzimde oryndaldy. Degenmen, sý tasqyny, joldardyń shaıylýy, kólik qozǵalysynyń qıyndaýy jáne tabıǵı-klımattyq jaǵdaılarǵa baılanysty ózgede kedergiler oblys aýdandaryndaǵy qalpyna keltirý jumystaryn júrgizýge kedergi keltirdi. Soǵan qaramastan apatty ajyratýlar jedel túrde joıyldy. Keıbir aýyldyq eldimekender qaıta elektrmen jabdyqtaldy nemese ýaqytsha elektrmen jabdyqtaýǵa kóshirildi. Sonymen qatar, Aqtóbe qalasy men oǵan jaqyn ornalasqan 43 saıajaı ujymdaryn qalpyna keltirip, elektrmen jabdyqtaý boıynsha jumystar júrgizildi, - dep habarlady Aqtóbe oblysynyń energetıka jáne turǵyn úı-kommýnaldyq sharýashylyǵy basqarmasy. 

Aıta keteıik, «Energosıstema» JShS-i qalpyna keltirý jumystarynyń shyǵyny 202,2 mln teńge bolady dep eseptegen. Oǵan 642 baǵana aýystyrylady. Qazirgi kezde 529 baǵanany aýystyrýǵa 73,3 mln teńge jumsaldy. 

Eske salsaq, Aqtóbe tasqyn saldaryn joıý úshin Úkimetten 19,2 mlrd teńge surady.