Sý tasqyny: Aqtóbede eki aýyldyń balalary tasymaldanyp oqytylady
Aqtóbe oblysy ákimi baspasóz qyzmetiniń habarlaýynsha, sý tasqyny kezinde zaqymdanǵan 14 bilim nysanynyń altaýyna jańa qurylys júrgiziledi. Bes bilim ordasyn salý úshin Úkimet rezervinen 6,2 mlrd teńge qarajat bólindi. Al Yrǵyz aýdany Nura aýylyndaǵy mektep jeke kásipker qarajaty esebinen salynyp jatyr.
- Aqtóbede oblysy boıynsha salynatyn 6 bilim ordasynyń úsheýi — mektep. Birinshiden Muǵaljar aýdany Kótibar batyr aýylyndaǵy 60 oryndyq mektep qurylysy jyl sońynda aıaqtalady. Onda bilim alatyn 38 oqýshy Aqkemer aýylyndaǵy mektepke tasymaldanady. Eki aýyldyń arasy 15 shaqyrym. Barlyǵy bir aýysymda bilim alyp, tústen keıin úıine oralady. Ekinshiden Yrǵyz aýdany Nura aýylyndaǵy mekteptiń bastaýysh synyp oqýshylary úshin sol aýyldaǵy úı qaıta jaraqtalyp beriledi. Bastaýysh synyptaǵy 22 balaǵa eki klass jasaqtalyp, olar sonda bilim alady. Al joǵary synyp oqýshylary onlaın oqıdy. Nuradaǵy mektep jyl sońynda qoldanysqa beriledi. Úshinshisi Oıyl aýdany Ekpetal aýylyndaǵy mektep. Aýyl túgel aýdan ortalyǵyna kóshirildi. Mundaǵy 320 oryndyq mektep qurylysy aıaqtalǵanǵa deıin balalar Oıyl kolledjinde oqıdy. Munda bar jaǵdaı jasalǵan. Kolledj ǵımaratyndaǵy mektepke 50 bala barady. Ol 9 synyptyń oqýshylary, - dedi Aqtóbe oblystyq bilim basqarmasy basshysynyń orynbasary Artýr Aýezov.
Aıta keteıik, bıyl 433 mektepte 180 myńnan astam bala oqıdy. Onyń ishinde 18 myńnan astamy 1 synypqa barady.
- 1-4 klass jáne arnaıy sanattaǵy otbasy balalaryna tegin tamaqtandyrýdy uıymdastyrýǵa tıisti qarajat jergilikti bıýdjetten bólindi. 1 qyrkúıekten bastap 79 590 oqýshy tegin tamaqtanady. Jyl saıyn jańa oqý jylynyń aldynda áleýmettik osal otbasy balalaryna kómek kórsetiledi. Bıyl 17 543 balanyń ata-analarynyń esepshottaryna qarjylaı kómek aýdarylady. Bul maqsatqa 761,4 mln teńge bólindi, - dedi Aqtóbe oblystyq bilim basqarmasynyń basshysy Jaıyq Sultan.
Jańa oqý jylyna deıin 3 800 oryndyq 6 mektep paıdalanýǵa beriledi.