Sý tasqyny: Aqtóbede buzylǵan bógetter jóndele me

<p>AQTÓBE. KAZINFORM &ndash; Sý tasqyny kezinde Aqtóbede kommýnaldyq menshiktegi 15 bóget buzyldy. Úsheýiniń kepildik merzimi bar. Al, ózgesiniń jobasy jasalyp, keıbirinde qurylys bastaldy.&nbsp;</p>

Kóktemgi sý tasqyny kezinde buzylǵan kommýnaldyq menshiktegi 15 bógettiń úsheýi byltyr ǵana qoldanysqa berilip, syr bergen. Olar​ Áıteke bı aýdanyndaǵy «Şerbakov», «Tereńsaı» jáne Alǵa aýdanydaǵy «Kósem» bógetteri. Qazirgi kezde «Kósem», «Tereńsaı» bógetterin merdiger mekemeler qalpyna keltirip jatyr. Al «Şerbakov» bógetine qatysty qozǵalǵan qylmystyq is áli tergeýde. Sondyqtan munda jumys toqtap tur.

– Oıyl aýdanyndaǵy «Aqkemer», «Qaratal» bógetterine jobalyq-smetalyq qujattamalar daıyndalyp, qazir ekologııalyq saraptamadan ótkizilip jatyr. Qujat ázirleý úshin qarjy aýdan ákimdiginen bólindi. Bıyl qurylys-montajdaý jumystaryn júrgizý josparlanǵan. Oǵan 945,5 mln teńge qarjy qajet. Al Temir aýdanyndaǵy «Qara» bógetin qalpyna keltirýdi «SNPS-Aqtóbemunaıgaz» AQ-y mindetine aldy. Mundaǵy shyǵyn - 200 mln teńge. Osy aýdandaǵy «Qopa» bógetine qajetti joba daıyndalyp, merdiger mekeme anyqtaldy. Qazir jóndeý júrip jatyr. Al «Qumsaı», «Shıtúbek» bógetterine arnalǵan jobalary saraptamaǵa jiberildi. ​Sonymen qatar, Shubarqudyq, Zadepo, Eńbekshi, Babataı, Shubarshy qorǵanys bógetterin (damba) salý úshin jobalary daıyndalýda, - dep habarlady Aqtóbe oblysy ákiminiń baspasóz qyzmeti. 

Aıta keteıik, Oıyl, Temir aýdandaryndaǵy bógetterdi qalpyna keltirý úshin Úkimettiń tótenshe jaǵdaı rezervi esebinen qarjy suralyp jatyr.

– Yrǵyz aýdanyndaǵy «Sheńbertal», «Janys bı», «Amankól», «Qara aryq», «Yrǵyz» qorǵanys bógetterine tehnıkalyq tekserý júrgizildi. Atalǵan bógetterdi jóndeý jáne nyǵaıtý úshin jobalyq-smetalyq qujat daıyndalyp jatyr. Sonymen qatar, «Qutıkól», «Belsher», «Qarasaı», «Qurylys», «Qumtoǵaı» qorǵanys bógetterinin salý josparlanyp otyr. Búgingi kúni Táýip, Mamyr, Jaısańbaı bógetterin jóndeý úshin jobalyq-smetalyq qujattamalaryna túzetýler júrgizilip jatyr, - dep habarlady oblys ákiminiń baspasóz qyzmeti.

Eske salsaq, Aqtóbedegi Yrǵyz aýdanynda sý tasqynyna qarsy kúres jumysy jaz shyqqanǵa deıin júrdi. Munda Táýip aýylynyń turǵyndary, áskerıler, tótenshe jaǵdaılar qyzmetkerderi úsh aı boıy jaǵany bekitti. 

Al, Qobda aýdany boıynsha Saýqaıyn, Batys, Oral-Oıyl bógetterine jobalyq-smetalyq qujattamalary daıyndalyp, saraptamadan ótkizilip jatyr. Quny- 419,4 mln teńge. Al Jaryq, Qoǵaly, Qanaı, Kenetaı, Biltaban, Qyzyljar, Lıman qorǵanys bógetterin qalpyna keltirýge arnalǵan qujat úshin 23 mln teńge qarjy qajet.

Kóktemde buzylǵan «Maǵadjan» bógeti qazirgi kezde jekeniń qolynda. Qylmystyq is qozǵalyp, tekserý jumystary júrgizilip jatyr.