Sý tasqyny: Aqtóbede búginge deıin qaıyqpen júrgen aýylda jol qatynasy jandandy

<p>AQTÓBE. KAZINFORM - Yrǵyz aýdany Jaısańbaı aýylynda jolǵa 26 metrge jýyq sýaǵar qubyr salyndy. Qazir kólik qatynasy jandandy.</p>

Aqtóbeniń Jaısańbaı aýyly sý tasqyny kezinde aralda qaldy. Aýyldy jaǵalaı sý basqan kezde birneshe ret ótkel, kópir salý jumysy júrgizilgen. Alaıda sý aǵysy qatty bolyp, esh nátıje bermegen. Turǵyndar sheshimin tabýdy, qysqa daıyndalý úshin ýaqyt az qalǵanyn aıtyp, máseleni qaıta kóterdi. Nátıjesinde aýdanaralyq mańyzy bar «Yrǵyz-Jaısańbaı» baǵytyndaǵy avtokólik jolyna uzyndyǵy 25,40 metrdi quraıtyn 7 sýaǵar qubyry salynǵan.

Foto: vıdeodan alyndy

- Osyǵan deıin joldyń jaǵdaıyn aıtyp, janaıqaıymyzdy jetkizdik. 4 aı boıy aýylǵa qatynaý qıyn bolǵan edi. Mine, jol paıdalanýǵa berildi. Atqarylǵan jumystardyń qorytyndysyn kórip otyrmyz. Biz suraǵandaı eki jerden bóget salyndy. Qatynastyń rettelgenine qýanyshtymyz. Barlyq osy jumystarǵa atsalysqan azamattarǵa, basshylarǵa alǵysymyzdy aıtamyz,- dedi óz qýanyshyn jetkizgen aýyl turǵyny Qonyskúl Qosybekova.

Foto: vıdeodan alyndy

Joldy qalpyna keltirý jumystaryna 5 tehnıka jáne 35 adam jumyldyryldy.

Aıta keteıik, Jaısańbaı aýylynda tasqyn kezinde qatynas úzilip, jaryq ta óshti.

Tasqynnan keıin jolsyz qalǵan aýyl turǵyndary búginge deıin qaıyqpen qatynady. Tipti keıde janar-jaǵarmaıyn ózderi quıdy.