Sý tasqyny: Aqtóbede bir aýdanǵa aparar kópirdi jóndeýge 4 mlrd teńge jumsalady

<p>AQTÓBE. KAZINFORM &ndash; Aqtóbede sý shaıǵan, sý ótken jol, kópirdi jóndeýge 15 mlrd teńgeden astam qarjy qajet. Bir ǵana Oıyl aýdanyna kireberis kópirdi qalpyna keltirýge 4 mlrd teńgege jýyq qarjy jumsalmaq.&nbsp;</p>

Aqtóbede oblystyq, aýdandyq mańyzy bar joldarda tasqynnan keıingi qalpyna keltirý jumysy júrgizilip jatyr. Bıyl kóktemde sý ótý, sý shaıý boıynsha barlyǵy 51 fakti tirkelgen. Sý tasqyny saldarynan «Shubarqudyq-Oıyl-Qobda», «Aqtóbe-Shubarqudyq», «Pokrovka-Temir-Keńkııaq-Embi» baǵytyndaǵy oblystyq mańyzy bar joldyń asfalt jabyndysy, kópirler, kireberis joldar zaqymdandy.

– Oıyl aýylyna kireberis joldaǵy kópirlerdiń tiregi men aralyq qurylymy jáne osy aýdandaǵy Qaratal, Kóptoǵaı, Amangeldi, Qaıyńdy, Qaraoı, Qobda aýdanyndaǵy Qanaı, Baıtaq, Kók úı, Ótek, Jaryq, Sarybulaq, Bestaý, Áıteke bı aýdanynydaǵy Áıke, Muǵaljar aýdanyndaǵy Temir-Kópir, Temir aýdanyndaǵy Tasqopa, Jambyl eldi mekenderiniń kireberis joldary zaqymdanǵan. Atalǵan ýchaskelerdi jobalaýshy kompanııalar men «Qazaqstan jol ǵylymı zertteý ınsıtýty» AQ-nyń mamandarymen birlesip qarap, zertteý jumystary júrgizildi. Nátıjesinde 47,2 shaqyrym jol jabyndysy, 23 kópir jáne 100 sý ótkizgish qubyrdy qalpyna keltirý jáne osal jerlerdi nyǵaıtý qajet. Ýchaskelerdi qalpyna keltirý boıynsha búginde jobalyq-smetalyq qujattamalary daıyndalyp, saraptamadan ótýde. Aldyn-ala esepteýlerge sáıkes, 15,6 mlrd teńge qarjy qajet ekeni anyqtalyp otyr. Onyń ishinde oblystyq mańyzy bar joldarǵa 5,4 mlrd teńge, aýdandyq mańyzy bar joldarǵa 10,2 mlrd teńge, - dep habarlady Aqtóbe oblysy ákiminiń baspasóz qyzmeti.

Vedomstvanyń habarlaýynsha, Qobda-Oıyl, Shubarqudyq-Oıyl-Qobda, Oıyl jáne Aqkemer aýyldarynda sý tasqynynan zardap shekkenderge arnap salynyp jatqan jańa úıler mańyna aýylishilik jol, Oıyl aýylyna kireberis kópir qurylysy bastaldy. 

– Aldymen kópirdiń ústingi qabatyn qyryp alady. Keıin tómendegi tirekterin aýystyrady. Negizi zaqymdanǵan bóligine basymdyq beredi. Bul jumystarǵa 4 mlrd teńgege jýyq qarjy qajet. Jobalyq-smetalyq qujat daıyn. Qarjyny Úkimet rezervinen surap otyrmyz. Al qazir merdiger mekeme óz qarjysyna jóndeý jumysyn bastap ketti, - dedi Aqtóbe oblystyq jolaýshylar kóligi jáne avtomobıl joldary basqarmasy basshysynyń orynbasary Eset Amanbaev. 

Eske salsaq, bıyl kóktemde Oıyl aýdanyna kireberistegi kópir jaramsyz bolyp qalyp, elimizde alǵash ret panton kópir turǵyndardyń qatynas quralyna aınaldy.