Sý tasqyny: Aqtóbede 76 kásipker shyǵyndy óteýge ótinish berdi

<p>AQTÓBE. KAZINFORM &ndash; Kóktemgi sý tasqyny kezinde zardap shekken 76 kásipker shyǵyndy óteýge ótinish túsirdi. Qazir komıssııa olardyń ótinishin qarap, tekserip jatyr. Alǵashqy legine qarjy aýdarýǵa sheshim qabyldandy.</p>

Aqtóbe oblysyndaǵy sý tasqyny kezinde birneshe aýdan men qalada 76 kásipker zardap shekti. Olardyń ótinishin óńirlik komıssııa qabyldady. Komıssııa jumysyn sáýir aıynda bastap, baǵalaý, esepteý júrgizdi. 

— Óńirlik komıssııaǵa túsken 10 ótinish maquldandy. Olarǵa 119 mln teńge shyǵyn bar dep sheshim shyǵaryldy. Sonymen birge búgin taǵy 6 kásipkerden ótinishi túsip, qaraldy. Olardyń qujatyna basymdyq beremiz. Jalpy eń kóbi Aqtóbe qalasyda tirkelip tur. Munda 46 kásipker ótinish berdi. Basym bóligi qyzmet kórsetý salasynda. Onyń ishinde jıhaz tsehy, plastıkalyq tereze jasaý tsehy men dúkender, kólikterge tehnıkalyq qyzmet kórsetý ortalyǵy bar, - dedi Aqtóbe oblystyq kásipkerlik basqarmasynyń basshysy Almas Salyqbaev.

Aıta keteıik, shyǵyn óteý úshin talap pen ereje bar. Úsh sanatqa bólingen. Birinshiden, baǵalaý qorytyndysyna jiberilgen shyǵyn óteledi. Ekinshiden, ǵımaratqa kelgen zalal óteledi. Úshinshiden, sýǵa ketip, jaramsyz bolyp qalǵan qural-jabdyq shyǵyny qaıtarylady. 

— Ǵımarat pen qural-jabdyq somasy baǵalaý qorytyndysy boıynsha óteledi. Al azyq-túlik dúkenindegi taýar bolsa, oblystyq memlekettik kirister departamentindegi kirister esebine sáıkes esepteledi. Aýyldaǵy kásipkerlerge keler bolsaq keıbiriniń qujattary túgel emes. Olar baǵalaý júrgizse, shyǵyny óteledi. Bıyl biz úshinshi ret komıssııa otyrysyn ótkizdik. Barlyǵy Úkimet rezervinen óńirge 733 mln teńge bólinip tur. Qarjy kólemi ózgerýi, ósýi múmkin, - dedi Almas Salyqbaev.

Buǵan deıin habarlaǵanymyzdaı, Aqtóbe oblysy Úkimet rezervinen 19,2 mlrd teńge surap otyr.