Sý tasqyny: Aqtóbede 681 otbasyǵa 220 mln teńge birjolǵy áleýmettik tólem jasaldy

<p>ASTANA. KAZINFORM &ndash; Aqtóbe oblysynda sý tasqynynyń beti qaıtyp, turǵyndar burynǵy ómir aǵynyna qaıta oralyp jatyr. Bul týraly Aqtóbe oblysy ákiminiń orynbasary Asylbek Esenbaev málim etti.&nbsp;</p>

«Keshe keshke oblys ákimi Ashat Berleshuly Shaharov beıneúndeý jarııalady. Onyń barysynda óńirdegi sý tasqyny ahýaly turaqtalyp, qaýip seıilgenin habarlandy. Biz burynǵy qalypty ómirimizge oralyp jatyrmyz. Qazirgi tańda, tek qana Yrǵyz aýdany táýekel aımaǵynda. Torǵaı ózenindegi sý deńgeıiniń kóterilýinen Nura jáne Mamyr aýyldarynda bógetterdi nyǵaıtý úshin qosymsha tehnıkalar jumyldyryldy. Aldyn-ala osy eldi mekenderdegi 126 adam evakýtsııalandy», - dedi Asylbek Esenbaev Ortalyq kommýnıkatsııalar qyzmeti alańynda ótken baspasóz máslıhatyna ZOOM arqyly qatysa otyryp.

Onyń aıtýynsha, atalǵan eki aýylda sýǵa ketken úıler joq.

«Búginde, sý tasqynynyń saldaryn joıý jumystary qarqyndy júrýde jáne onyń oń dınamıkasy kórinip keledi. Memleket basshysynyń tapsyrmasy boıynsha sý tasqynynan zardap shekkenderdiń barlyǵyna tıisti kómek kórsetilip jatyr. 6 sáýirden bastap birjolǵy áleýmettik tólem berilýde. Qazirgi ýaqytta 681 otbasyǵa 220 mln teńge tólendi jáne 494 otbasynyń qujattary qaralýda», - deıdi ol. 

Eske sala ketsek, keshe Yrǵyzda tutas bir aýyldyń turǵyndary qaýipsiz jerge kóshirilip jatqany týraly habarlaǵan edik.