Sý tasqyny: Aqtóbede 500-ge jýyq úıdiń qurylysy júrip jatyr
Aqtóbe oblysy ákiminiń baspasóz qyzmeti sý tasqyny men tasqynnan keıingi jumystar týraly keıingi aqparatpen bólisti. Sý tasqyny kezinde barlyǵy 4 084 úı búlingen. Sonyń 1 457-i jer úı bolsa, qalǵany saıajaı aýmaǵyndaǵy baspana. Qazir sý tasqyny aıaqtalǵan aýdandar men qalada tehnıkalyq tekserý aıaqtaldy. Nátıjesinde 652 úıdi jańadan salý, 309-yn satyp alýǵa kelisim berildi. Jańadan salynyp jatqan úılerdiń bári bir tıpti, aýdany 80 sharshy metrdi quraıdy. Al 3 123 úı jóndeledi.
– Sý tasqyny saldaryn joıý jumystaryna jergilikti bıýdjetten 7,8 mlrd teńge qarastyryldy. Turǵyn úı máselesimen qatar 136 shaqyrym jol, 15 kópir men 23 áleýmettik nysandy jóndeý qajet. Sondyqtan tek bıýdjet emes, iri kompanııalar men qoǵamdyq qorlar qoldaý kórsetip, turǵyn úı qurylysy júrip jatyr. Olar: «Bolat Ótemuratov qory», «Qazaqstan halqyna» qory, «BI Group» jáne «ERG» qory. Bolat Ótemuratov qorynyń demeýshiligi arqyly Áıteke bı, Oıyl, Qobda, Temir jáne Muǵaljar aýdandarynda 64 úı satyp alyndy. Sonymen birge osy qor Alǵa, Mártók, Baıǵanın aýdandarynda taǵy 11 úıdi satyp alyp beredi. Bul aýdandarda tótenshe jaǵdaı jarııalanbady, biraq tasqyn kezinde birer úı jaramsyz bolyp qaldy. BI Group kompanııasy oblysqa 2, «Qazaqstan halqyna» qory 1,5 mlrd teńge bóldi. Bul qarjy úı qurylystaryna baǵyttaldy, - dedi Aqtóbe oblysy ákiminiń baspasóz qyzmeti.
Aqtóbeniń 5 aýdanynda úı salý jumystary júrip jatyr. Barlyǵy 494 úıdiń qurylysyna 40 merdiger kompanııa jumyldyrylǵan. Sonymen birge 420 úıde jóndeý bastaldy. Jumysty tolyq júıelep qoıǵan Áıteke bı aýdanynda barlyǵy 115 úı búlingen.
– Tehnıkalyq tekserýden soń 64 úı jóndeýge jaramdy dep tanyldy. Olarǵa ótemaqy tólenip jatyr. Al 51 úı turýǵa jaramsyz dep tanyldy. Sol úıdiń ishinde 25 otbasy daıyn úı satyp alýǵa sheshim qabyldady. Qazirgi kezde 23 úı alyndy. Qalǵan eki turǵyn osy aptada qonystanady. Al qalǵan 26 úıdiń ıesi úıdiń salynýyn kútedi. Qazirgi kezde qurylys júrip jatyr. Qurylys kompanııalarymen aradaǵy kelisim boıynsha 1-tamyzǵa deıin barlyq úı qoldanysqa beriledi. Aýdanda sý tasqynynan zardap shekkenderdiń bári 100 AEK kóleminde birjolǵy tólemdi aldy. Sonymen birge jeke tulǵalar mal shyǵynyn óteý týraly ótinish jazdy. Olarǵa 1,4 mln teńge tólendi. Zańdy tulǵalardyń shyǵynyn óteý erejesi endi shyqty. Shamamen shyǵyn 10 mln teńge bolady dep otyrmyz, - dedi Áıteke bı aýdanynyń ákimi Dáýletııar Toǵyzbaev.
Al, Yrǵyz aýdanynda sý tasqynyna qarsy kúres jumysy áli de jalǵasyp jatyr. Munda Quılys pen Jaısańbaı aýyldarynda jergilikti turǵyndar men áskerıler, tótenshe jaǵdaılar qyzmetiniń qyzmetkerleri bógetti bekitý jumysyn jalǵastyryp jatyr.
– Qazir Quılys jáne Jaısańbaı aýyldaryndaǵy sý deńgeıi 20 kúnnen beri bir deńgeıde tur. Quılysta azdap tómendeý tirkeldi. Sanaýly ǵana sm bolǵan soń birqalypty dep aıtýǵa bolady. Quılysta 11 tehnıka, 65 áskerı qyzmetker jáne jergilikti turǵyndar jumys istep jatyr. Qap, janar-jaǵarmaı, kólikti jalǵa alý shyǵynyn óteý úshin qarjy bıýdjetten bólinip jatyr. Tehnıkany jalǵa alý merzimi jaǵdaıǵa qaraı ári qaraı sozylýy múmkin. Al Jaısańbaıda 6 tehnıka, 15 áskerı qyzmetker men jergilikti adamdar jumys istep jatyr. Quılysta tek er adamdar júr. Biz osy aptada balalar men áıelderdi úıine qaıtarǵymyz keledi. Al aýdanǵa qarasty Mamyr men Belsher aýyldarynyń turǵyndary úılerine oralyp jatyr, - dedi Yrǵyz aýdanynyń ákimi Nurlan Qyzbergenov.
Onyń aıtýynsha, eń kóp zardap shekken Nura aýylyndaǵy úılerdiń basym bóligi áli de sýda tur. Onda buǵan deıin sý deńgeıi 3 metrge bolsa, qazir shamamen 80-90 sm tómen túsken.
– Tehnıkalyq tekserý komıssııasy endi keledi. Qazirgi kezde shamamen Mamyrda 15, Belsherde 4, Nurada 68 úı qulaǵan. Sý tasqynynan zardap shekkenderge 100 AEK kólemindegi birjolǵy tólem berilip jatyr. Búginde 70 mln teńgedeı qarjy aýdaryldy, - dedi Nurlan Qyzbergenov. Yrǵyz aýdany boıynsha Nura aýyly túgel kóshirilip, Saryoba jerinde qurylys júredi.
Aıta keteıik, oblys boıynda barlyǵy 2904 adamǵa 100 AEK kóleminde birjolǵa tólem aýdaryldy. Bul degenemiz 939,2 mln teńge. Sonymen birge sý tasqyny kezinde jumysy toqtaǵan shaǵyn jáne orta bıznes sýbektisiniń shyǵyny 3 mıllıard teńgege jýyqtaıdy.