Sý tasqyny: Aqtóbede 30 sharýanyń ótinimi maquldandy

<p>AQTÓBE. KAZINFORM &ndash; Aqtóbe oblysynda sharýalar shyǵyny áli eseptelip jatyr. Qazirgi kezde 30 sharýanyń ótinimi maquldandy.</p>

Aqtóbe oblysynda sharýalardan ótinim qabyldaýdy kásipkerlik basqarmasy júzege asyryp jatyr. Basqarma basshysy Almas Salyqbaevtyń aıtýynsha, qazirgi kezde 30 sharýanyń qujattary tekserilip, maquldandy.

- Aqtóbe oblystyq aýyl sharýashylyǵy basqarmasy barlyǵy 97 sharýa qojalyǵynyń tizimin berdi. Boljam boıynsha shyǵyny 704 mln teńge dep berildi. Qazirgi kezde baǵalaý qorytyndylary shyǵyp jatyr. Onda soma ártúrli. Biri 10 mln teńge dese 8 mln, al 10 mln dep boljaǵandarǵa 12 mln esepteldi. Ótken aptada 30 sharýa qojalyǵy ıesiniń ótinimi maquldandy. Qarjy Úkimet rezervinen bólinedi, - dedi Aqtóbe oblystyq kásipkerlik basqarmasynyń basshysy Almas Salyqbaev.

Aıta keteıik, aqtóbelik sharýalar sharýashylyqtaǵy qora men úı shyǵynyn eseptep, ony óteýdi surady. Bul jumys kúzde bastaldy. 

Eske salsaq, buǵan deıin kásipkerlerdiń shyǵyny óteldi.