Sý tasqyny: Aqtóbe oblysynda 595 jańa úı salynady
«Sý tasqynyna baılanysty Aqtóbe qalasy men 6 aýdanda tótenshe jaǵdaı jarııalanǵan. Qazir bir aýdanda ǵana jaǵdaı kúrdeli. Sý tasqynyn joıý maqsatynda arnaıy komıssııa quryldy. Oblystyń sý tasqynynan zardap shekken azamattaryna jan-jaqty kómek kórsetilýde. Bir rettik áleýmettik kómek berilip jatyr. 1 881 azamat 613 mln teńgeden astam tólemdi aldy. Munan bólek, kelgen shyǵyndy esepteıtin komıssııa qurylyp, 11 sáýirden tólem júrgizip jatyr. 215 aqtóbelik otbasyna 433 mln 284 myń teńge somasynda materıaldyq shyǵyn óteldi. Sharýalar da kómekten tys qalyp jatqan joq. Jalpy oblys boıynsha 3 232 bas maldyń ólgeni rastaldy, barlyǵynyń kózi joıyldy», - dedi ol Ortalyq kommýnıkatsııalar qyzmetindegi brıfıngte.
Onyń atap ótýinshe, osy ýaqytqa deıin 246 mal basyna, ıaǵnı iri qara jáne usaq mal, jylqy men túıege 35 mıllıon teńgege jýyq aqsha tólendi. Jalpy, bul maqsattarǵa 2,2 mlrd teńge qarastyrylǵan. Óńirde epıdemıologııalyq jáne epızootologııalyq jaǵdaı turaqty, juqpaly aýrýlardyń órshýi tirkelgen joq.
Óńirge jan-jaqtan gýmanıtarlyq júkter de jetkizilip jatyr. Máselen, kúni keshe Yrǵyz aýdanyna azyq-túlik túrinde 22,2 tonna gýmanıtarlyq kómek pen 23 tonna janar-jaǵarmaı jetkizildi.
«Qazirgi ýaqytta 2 451 úı zardap shekti. 595 úı salý josparlanǵan. Ótken aptada óńir basshysy Ashat Shaharov Oıyl jáne Qobda aýdarynda jumys saparymen boldy. Jergilikti turǵyndarmen kezdesip, ahýaldy baǵamdady. Qobdada 69 úıdiń qazyǵy qaǵyldy. Munda 150-ge jýyq úı boı kóteredi. Sý tasqynynan eń kóp zardap shekken aýdandardyń biri – Oıyl. Osy aýdannyń Qaratal aýylynda 178 úı salynady. Al aýdan ortalyǵyna kóshýge nıet bildirgen turǵyndar úshin 200-den asa úı salynbaq», - dedi Gúlbaǵda Kóbeeva.