Sý tasqyny: 9 myńnan astam adam úılerine oraldy

<p>ASTANA. KAZINFORM &ndash; Sý tasqyny bastalǵaly beri 99 920 adam, onyń ishinde 36 593 bala qaýipsiz jerlerge jetkizildi. QR TJM Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash</p>

Onyń aıtýynsha, 9 343 adam úılerine qaıta oraldy. Ýaqytsha ornalasý pýnkterine 6 566 adam, onyń ishinde 3 194 bala ornalasqan. 

«Búgingi tańda avarııalyq-qutqarý jumystarynda 38 595 adam, 3 879 tehnıka, 17 áýe kemesi jumyldyryldy.Jalpy 9 mln tekshe metr erigen qar sýy soryp shyǵaryldy, 1,6 mln qapshyq jáne 1,2 mln tonna ınertti materıal tóseldi», -dedi E. Saıpash respýblıkalyq aqparattyq shtabta ótken brıfıngte.

Osy saǵatta Atyraý, Aqtóbe, Aqmola, Qostanaı, Shyǵys Qazaqstan, Soltústik Qazaqstan oblystarynda 3 544 jeke turǵyn úı, 567 aýla aýmaǵy jáne 1 778 saıajaı úıleri sý astynda qalyp otyr. 

Al 3 071 turǵyn úı men 1 931 aýla aýmaǵynan sý buryldy. 

«Qardyń tez erýi jáne Jabaı, Boqsyq, Jolboldy, Qalqutan, Esil, Torǵaı ózenderinde sý deńgeıiniń kóterilýine baılanysty Aqmola oblysynyń Atbasar, Bulandy, Astrahan, Jaqsy aýdandarynyń 12 eldi mekeninde, Soltústik Qazaqstan oblysy Qyzyljar aýdanynyń 6 eldi mekeninde, Aqtóbe oblysynyń Yrǵyz aýdanynda 673 adam aldyn ala evakýatsııalandy», - dedi E. Saıpash. 

Elimizdiń 8 óńirinde Aqtóbe, Qostanaı, Batys Qazaqstan, Aqmola, Qaraǵandy, Atyraý, Soltústik Qazaqstan jáne Ulytaý oblystarynda jergilikti aýqymdaǵy 35 TJ jarııalanǵan. 

«TJM azamattardy asa muqııat bolýǵa, sý tasqyny kezeńinde qaýipsizdik sharalaryn múltiksiz saqtaýǵa, úılerden jáne evakýatsııalaý pýnktterinen tıisti ruqsatsyz ketpeýge shaqyrady», - dedi spıker.