Sý tasqyny: 7014 adam evakýatsııalyq pýnkterdi panalap otyr

<p>ASTANA. KAZINFORM &ndash; Búginde sý tasqyny oryn alǵan aımaqtarda 13543 adam óz úılerine oralǵan. Dese de áli kúnge deıin 7014 adam, onyń ishinde 3144 bala evakýatsııalyq pýnktterdi panalap otyr.</p>

Ortalyq kommýnıkatsııalar qyzmetinde ótken brıfıngte QR TJM Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash sý tasqyny boıynsha sońǵy málimettermen bólisti.

«Jumyldyrylǵan kúshter men quraldar 9,7 mln tekshe metrden astam erigen qar sýyn soryp shyǵardy, 2,4 mln qapshyq jáne 1,2 mln tonnadan astam ınertti materıaldy tósedi. Sý tasqyny bastalǵaly beri barlyǵy 113 693 adam, onyń ishinde 39 922 bala qutqarylyp, evakýatsııalandy. 107 613 aýyl sharýashylyǵy janýarlary qaýipsiz jerge aıdaldy. 3 570 turǵyn úı men 2 195 aýla aýmaǵynan sýdyń baǵyty buryldy», – dedi ol.

Belgili bolǵandaı, Aqtóbe, Qostanaı, Aqmola, Atyraý, Soltústik Qazaqstan oblystarynda 5 708 jeke turǵyn úı, 1 609 aýla aýmaǵy jáne 2 035 saıajaı úıleri sý astynda qalǵan.

Avarııalyq-qutqarý jáne sý tasqynyna qarsy jumystarǵa 34 myń adam, 4 242 tehnıka, onyń ishinde, 890 sý sorý quraly, 335 júzý quraly, 19 áýe kemesi jumyldyrylǵan.