Sý tasqyny: 13 myńnan astam otbasy 5 mlrd teńgege jýyq áleýmettik tólem aldy

<p>ASTANA. KAZINFORM &ndash; Sý tasqynynan zardap shekken azamattarǵa keltirilgen zalaldy óteý jalǵasýda. Úkimettiń sońǵy aqparaty boıynsha, 13 547 otbasy 4,9 mlrd teńgeden astam birjolǵy tólem aldy. Bul týraly &laquo;Jibek Joly&raquo; telearnasynda &laquo;Biz birgemiz&raquo; telemarafonynda aıtyldy. Memleket basshysy Qasym-Jomart Toqaev Qazaqstan halqy Assambleıasynyń kezekti HHHІІІ sessııasynda búlingen turǵyn úıler men ınfraqurylymdy qalpyna keltirý jumysyn jeke baqylaýǵa alatynyn aıtqan edi.</p>

«Tabıǵat apatyn eńseretin kún alys emes. Topan sý ketken soń odan zardap shekken aımaqtar qalpyna keltiriledi. Eń aldymen, azamattarǵa shyǵyndaryn óteý úshin tıisti ótemaqy tólenedi. Úı-jaı qurylysy bastalady, baspana beriledi, búlingen ınfraqurylym jóndeledi. Osy qyrýar jumys óte az ýaqytta, ıaǵnı jaz ben kúzdiń 5-aq aıynda aıaqtalýǵa tıis. Biraq biz birlesip, bul sharýany abyroıymen atqaryp shyǵamyz dep senemin», - dedi Prezıdent.

Sonymen birge, 527 úıdi qalpyna keltirýge 682 mıllıonnan astam teńge bólindi. Shyǵyn bolǵan mal basy úshin 301 mln teńge berilgen. 

«Aqmola, Qostanaı jáne Pavlodar oblystarynda 50-den astam otbasy úıler men páterlerge qonystandy», - dedi telemarafon júrgizýshisi. 

Aıta keteıik, sý tasqynyndaǵy el birligine arnalǵan «Biz birgemiz» telemarafony «Jibek Joly» arnasynda jalǵasýda. 5 saǵattyq tikeleı efırde tasqyn basqan aýmaqty kózben kórgen, tabıǵı apattan zardap shekken turǵyndardyń jan tebirenter oqıǵalary aıtylyp, tabıǵı apat aımaqtarynan reportajdar beriledi. 

Buǵan deıin sý basqan aımaqtarǵa alǵash bolyp kómekke barǵan TJM qutqarýshylary, sarbazdar men tártip saqshylary suhbat bergen edi.