Sý tasqyny kezinde qurylǵan jedel jeli jumysy jalǵasady
«Búginde Aqmola jáne Batys Qazaqstan oblystarynda zardap shekkender úshin satyp alynǵan keıbir úılerde jóndeý jumystary bitýge jaqyn. Olardy tez arada aıaqtap, turǵyndarǵa tapsyrý kerek. Qıyn-qystaý kezdegi adamdardyń emotsııalaryn túsinemiz. Keıbir turǵyndar tarapynan ótemaqy somasyna, shyǵyndy anyqtaý, baspana tańdaý jáne jóndeý jumystaryna qatysty suraqtar týyndady. Ár problemany jeke alyp qaraýǵa tyrystyq. Qabyldanyp jatqan sharalar zardap shekken ár otbasynyń pikirin barynsha eskere otyryp, iske asyrylyp jatyr. Tasqynǵa qatysty azamattarda suraqtar men problemalar bolýy múmkin, osyǵan oraı ákimdikterge jedel jeli jumysyn toqtatpaı, jergilikti halyqtyń suraqtaryn shuǵyl qarap, sheshýdi tapsyramyn», - dedi Oljas Bektenov Úkimet otyrysynda.
Odan bólek, Úkimet basshysy áleýmettik obektilerdiń zardap shekkenin málim etti.
«Olardy qalpyna keltirý jumystary da qomaqty qarjy shyǵyndary men adamı resýrstardy talap etti. Dıhandarǵa egis naýqanyn ýaqtyly júrgizý úshin barlyq qajetti kómek kórsetildi, shyǵyn bolǵan mal basyna ótemaqy tólendi. Jalpy, osy qysyl-taıań kezeńde eshkim de eskerýsiz qalǵan joq. Prezıdent tapsyrmasy boıynsha Úkimettiń jáne ákimdikterdiń rezervterimen birge, qorlar men demeýshilerdiń de qarajaty tartyldy», - deıdi ol.