Sý tasqyny: Aqtóbe qalasynda 136 otbasyna úı satyp alyndy
Sý tasqyny kezinde Aqtóbe qalasy boıynsha 3500-den astam otbasy zardap shekti. Tehnıkalyq tekserý, baǵalaý jumystary kezinde 190 úı jaramsyz dep tanylǵan. Qazirgi kezde olardyń 136-y jańa páterge qonystandy. Aqtóbe qalasy ákiminiń baspasóz qyzmetiniń habarlaýynsha, áli de 60-qa jýyq otbasyna páter satyp alynady.
- 2000 jyly Yrǵyz aýdanynan Aqtóbe qalasyna kóship keldik. Sol kezde ÝDV-4 baý-baqsha ujymy aýmaǵynan úı alyp, keńeıtip, qosymsha qurylys júrgizdik. Tórt bólmeli úı bolatyn. Ulym sonda úılendi, qyzym turmysqa shyqty. 2017 jyly sý tasqyny kezinde úıge sý kirip, kóp uzamaı jóndep aldyq. Al bıyl 28-naýryzda sý kóterildi. Úıimiz arada 3 saǵat ótkende qulady. Biz aldymen mekteptegi evakýatsııalyq beketke baryp, keıin kolledjdiń jataqhanasyna ornalastyq. Baspanamyz túgel qırap qalǵan soń osy páterdi berdi. Bárine alǵysymdy aıtamyn,- dedi zeınetker Balıla Baıqazaqova.
Onyń aıtýynsha, eki bólmeli páterde balasy men kelini, úsh nemeresi jáne qyzymen qosqanda 7 jan turady. Qazirgi kezde balalardy mektepke ornalastyrý, balabaqshaǵa berý jumystaryn da tolyq rettegen.
- Kúıeýim tasymaldaý kompanııasylda temir ustasy, ózim dárihanada qyzmetkermin. Jańa páterge kirgen kezde ózimniń jumys berýshim barlyq jıhazyn alyp berdi. Sol úshin de alǵys aıtamyn. Qazirgi kezde mektepke baratyn eki balany Qyzyljar orta mektebine berýdi josparlap qoıdyq. Al 3 jastaǵy ulym balabaqshaǵa tirkeldi. Bári úshin alǵys aıtamyn, - dedi Aqmaral Qaıdarova.
Bul otbasyna páter Aqtóbe qalasy Eset batyr turǵyn alabynan berildi.
Aıta keteıik, Aqtóbe qalasynda úı salý jumysy júrgizilmeıdi. Munda kópqabatty úıden páter satyp alýǵa túrli qor arqyly qarjy bólinip jatyr. Sonymen birge Otbasy bank pen oblys ákimdigi 1,5 mlrd teńge bólip, 100 otbasynyń baspanaly bolýyna jaǵdaı jasaıdy.