Sý sharýashylyǵyn damytýdyń keshendi jospary qandaı nátıje beredi – mınıstrdiń jaýaby
«Parlament depýtattary sý sharýashylyǵynyń ózekti máselelerin únemi kóterip júr. Keıingi 3 jylda 60-tan asa suraqty qamtyǵan 30 depýtattyq saýal kelip tústi. Saýalda kóterilgen máselelerdi taldap, olardyń oryndalýynyń baǵyt baǵdaryn aıqyndadyq. Olardyń basym baǵyty aýyz sý máselesi men gıdrotehnıkalyq qurylysqa qatysty. Osyǵan baılanysty atqarylyp jatqan is-sharalardyń negizgi baǵyttaryna toqtaýdy ruqsat etińizder. Sý salasyndaǵy qordalanǵan máselelerdi sheshý óte mańyzdy jáne olardy keshendi, júıeli túrde sheshý aıtarlyqtaı qarjyny qajet etedi. Bul rette, mınıstrlik sý qoımalaryn salý ári rekonstrýktsııalaý, gıdrotehnıkalyq qurylystardy, ırrıgatsııalyq júıeler men toptyq sý qubyrlaryn qaıta qurý jónindegi birqatar shuǵyl sharalardy kózdeıtin Sý sharýashylyǵyn damytýdyń 2024-2030 jyldarǵa arnalǵan keshendi josparyn ázirledi. Keshendi jospardy iske asyrýdyń boljamdy quny – 2 trln teńge», – dedi N. Nurjigitov.
Onyń sózine qaraǵanda, keshendi josparda 2024-2026 jyldary tıisti kórsetkishter qarastyrylǵan. Bul turǵyda 3500 km sýarmaly kanaldardy qaıta jańartý, 3,7 tekshe km sýdy qosymsha jınaqtaý úshin 20 jańa sý qoımasyn salý jáne jumys istep turǵan 15 sý qoımasyn qaıta jańartý, ırrıgatsııalyq júıelerdi tolyqqandy jańǵyrtý ári tsıfrlandyrý eskerilgen.
«Qazir 1,8 mln gektar sýarmaly jerde sý únemdeý tehnologııalary tek 17 paıyzynda (279,5 myń ga) qoldanylady. Aýyl sharýashylyǵy taýaryn óndirýshilerin sý únemdeý tehnologııalaryn qoldanýǵa yntalandyrý maqsatynda sýarý júıelerin qurýǵa, tamshylatyp jáne jańbyrlatyp sýarý jabdyqtaryn satyp alýǵa arnalǵan shyǵystardy sýbsıdııalaý úlesin 50 paıyzdan 80 paıyzǵa deıin ulǵaıtý usynylady. Bul 2026 jylǵa qaraı eldiń ońtústik óńirlerinde sý únemdeý tehnologııalaryn qoldana otyryp, sýarmaly jerler alańyn 42 paıyzǵa deıin ulǵaıtýǵa (613,6 myń gektar) jáne sýdy 1,5 tekshe km deıin únemdeýge múmkindik beredi», – dedi mınıstr.
Sonymen qatar vedomstvo basshysy tsıfrlandyrý baǵyty boıynsha mınıstrlik «Qazaqstan ǵarysh sapary» Ulttyq kompanııasymen birlesip sý resýstarynyń ınteraktıvti geoaqparattyq platformasyn ázirlep jatqanyn aıtty. Bul aqparattyq júıe 2024 jyldyń úshinshi toqsanynda óndiristik paıdalanýǵa beriledi. Mınıstrlik Almaty, Jambyl, Qyzylorda jáne Túrkistan oblystarynda 3500 km sýarý jelilerin tsıfrlandyrý jónindegi jumystardy atqaryp jatyr. Jobany iske asyrý sýarmaly jerdiń 362 myń gektarynda sýdy esepke alýdy qamtamasyz etedi. Bul jyl saıyn 0,6 tekshe km sýdy únemdeıdi.
«Atap aıtqanda, eger biz josparlaǵan barlyq is-sharany tolyqqandy júzege asyrsaq, 10,1 tekshe km sýdy únemdeımiz», - dedi vedomstvo basshysy.