Sý salasyndaǵy problemalardy sheshýge iri qarjy ınstıtýttary tartylady – mınıstr
Keńes mınıstrliktiń, halyqaralyq uıymdardyń jáne donorlyq qaýymdastyqtyń kúsh-jigerin úılestire otyryp, eldegi uzaq merzimdi ekologııalyq turaqtylyq pen ekonomıkalyq damýdy ilgeriletýde mańyzdy ról atqarady. Úılestirý keńesi resýrstardy jumyldyrýǵa, basqarýdy nyǵaıtýǵa, óńirlik yntymaqtastyqty keńeıtýge jáne sý resýrstaryn basqarýda turaqty tájirıbelerdi ilgeriletýge yqpal etetin bolady.
«Bir jyl buryn bul salada jańa mınıstrlik quryldy. Osy ýaqyt ishinde negizgi úsh baǵytta jumystardy atqardyq. Birinshiden, jańa quqyqtyq bazany qalyptastyrýǵa ekpin qoıyldy. Parlament Májilisinde Sý kodeksiniń jobasy qaralyp jatyr jáne jyldyń aıaǵyna deıin osy qujat qabyldanýy múmkin. Sonymen qatar, sý resýrstary baǵytynda 2024-2030 jyldarǵa arnalǵan tujyrymdamany bekittik. Atap aıtqanda, saladaǵy jumystardy júzege asyrý úshin búgin elordada Sý sektoryn damytý boıynsha seriktesterdiń úılestirý keńesiniń birinshi otyrysyn uıymdastyrdyq», - dedi Sý resýrstary jáne ırrıgatsııa mınıstri Nurjan Nurjigitov elordada ótken jıynda tilshiler suraǵyna jaýap bere otyryp.
Úılestirý keńesiniń negizgi mindetterine toqtalsaq, ulttyq basymdyqtarǵa sáıkes, memlekettik organdardyń, BUUDB, halyqaralyq qarjy uıymdary men donorlyq qoǵamdastyqtyń kelisilgen is-qımylyn qamtamasyz etý eskerilgen. Keńes alǵa qoıylǵan maqsattarǵa jetý úshin qarjy ári tehnıkalyq resýrstardy jumyldyrýmen jáne tıimdi bólýmen aınalysady. Sý resýrstaryn basqarý salasynda ozyq halyqaralyq tájirıbe men ınnovatsııalyq sheshimderdi engizý qarastyrylyp otyr. Keńes aıasynda sýdy basqarý salasyndaǵy óńirlik yntymaqtastyqty nyǵaıtý qamtylǵan.
«Sý salasynda elimizde bar problemalardy sheshýge ári qarjylandyrýǵa halyqaralyq qarjy ınstıtýttary men iri kompanııalardy shaqyryp jatyrmyz. Búgingi birinshi otyrystyń qorytyndysy boıynsha hatshylyq qurylyp, arnaıy ereje qabyldanady. Osy oraıda jylyna eki ret bul otyrysty ótkizemiz. Keıingi 5-6 jyldyń ishinde Eýropa qaıta qurý jáne damý bankimen, Dúnıejúzilik bankpen jáne Islam damý bankimen birlese jumys istep jatyrmyz. Qazir osy úsh qarjy ınstıtýty sý salasyndaǵy jobalardy qarjylandyryp jatyr. Keler jyly jobalar aıaqtalady. Dúnıejúzilik bankpen Araldy qalpyna keltirý jobasynyń ekinshi kezeńin bastamaqpyz. Bul baǵytta tıisti qujattar daıyndalyp otyr. Odan bólek, Islam damý bankimen iri jobany júzege asyrmaqpyz. Qazan aıynda negizgi kelisimshartqa qol qoıamyz», - dedi mınıstr.