Sý resýrstary júıesin damytýǵa qatysty bilim berý baǵdarlamalary jańartylady

NUR-SULTAN. QazAqparat – Sý resýrstaryn basqarý júıesin damytýǵa qatysty bilim berý baǵdarlamalaryn jańartý josparlanǵan. Bul týraly senatorlardyń depýtattyq saýalyna joldaǵan jaýabynda QR Premer-Mınıstri Álıhan Smaıylov málim etti, dep habarlaıdy QazAqparat tilshisi.

«Sý sharýashylyǵynyń barlyq baǵyttary men deńgeıleri boıynsha bilikti kadrlar daıarlaý jaǵdaıyn jaqsartý úshin 2020 jyly M. Dýlatı atyndaǵy Taraz óńirlik ýnıversıtetinde «Sý sharýashylyǵy jáne tabıǵat ornalastyrý ınstıtýty» ashyldy. Instıtýttyń bakalavrıaty men magıstratýrasy aıasynda «Gıdrotehnıkalyq qurylys jáne qurylysjaılar», «Gıdrotehnıkalyq melıoratsııa», «Eldi mekenderdi sýmen jabdyqtaý jáne sý burý», «Sý resýrstaryn basqarý», «Melıoratsııa jáne sýarmaly eginshilik», al doktorantýra baǵytynda «Gıdrotehnıkalyq qurylys jáne qurylysjaılar» bilim berý baǵdarlamalary boıynsha oqytý júzege asyrylatynyn atap ótken jón.

Bıyl ınstıtýt bazasynda «Akademııalyq artyqshylyq ortalyǵy» ashyldy, onyń negizgi mindeti - sý resýrstaryn basqarýdaǵy jańa tehnologııalardy zerdeleý jáne olardy oqý protsesine kiriktirý úshin ǵylymı uıymdarmen, sondaı-aq halyqaralyq oqý oryndarymen ózara is-qımyl jasaý», - delingen Úkimet basshysynyń senatorlarǵa bergen jaýabynda.

Aıtýynsha, Nebraska shtatynyń ýnıversıtetimen (AQSh) yntymaqtastyq jolǵa qoıyldy, onymen aýyl sharýashylyǵynda sý resýrstaryn paıdalaný tehnologııalary pysyqtalyp jatyr. Usynylǵan tehnologııalarmen tanysqannan keıin, olardy Qazaqstan jaǵdaıynda paıdalaný múmkindigi turǵysynan ǵylymı uıymdarmen talqylaý júrgiziledi. Osy oraıda, tıisti oqý baǵdarlamalary úshin modýlder ázirlenetin bolady.

«Sý resýrstaryn basqarý júıesin damytýdyń 2030 jylǵa deıingi tujyrymdamasynyń jobasynda memlekettik basqarý júıesin jetildirý úshin ınnovatsııalyq pánderdi qosa otyryp, bilim berý baǵdarlamalaryn jańartý eskerilgen. Atap aıtqanda, Eýropadaǵy qaýipsizdik jáne yntymaqtastyq uıymynyń qoldaýymen «Gıdrotehnıkalyq qurylysjaılar salý» bilim berý baǵdarlamasyn ázirleý júrgizilip jatyr. Jalpy, sý qaýipsizdigin qamtamasyz etý máseleleri Úkimettiń erekshe baqylaýynda jáne qalyptasqan jaǵdaıdy eskere otyryp, tıisti sharalar qabyldanyp jatyr», - deıdi Á. Smaıylov.

Budan buryn habarlanǵandaı, 2023 jyly jańa Sý kodeksiniń jobasy Parlamentke engiziledi.

Bıyl aqpan aıynda QR Prezıdenti Qasym-Jomart Toqaev Úkimetke klımattyń ózgerýi men shekaralas elderdiń saıasatyn eskeretin jańa Sý kodeksin ázirleýdi tapsyrdy.

Sondaı-aq, sý resýrstaryn basqarýdyń jeke memlekettik organy qurylmaıtyny málim boldy.