Sý resýrstary jáne ırrıgatsııa mınıstrligi qurylady

ASTANA. QazAqparat – Sý resýrstary jáne ırrıgatsııa mınıstrligi qurylady. Bul týraly Parlament palatalarynyń birlesken otyrysynda Qazaqstan halqyna Joldaýyn jarııalaǵan Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Sý únemdeıtin tehnologııalardy engizý – asa mańyzdy jáne shuǵyl mindet. Sondyqtan tıimdi tásilder usyný qajet. Degenmen biz dál qazirgi jaǵdaıda jańa tarıf saıasatynan da attap óte almaımyz. Ábden eskirgen ınfraqurylym áreń jumys istep tur. Sondyqtan jańa ınfraqurylym salý – óte mańyzdy mindet, qazirgi naryqtyń talaby. Sýdy normatıvten artyq jumsaǵandar onyń aqysyn joǵary tarıfpen tóleýi kerek. Bir sózben aıtsaq, sýdy barynsha únemdeýimiz qajet. Oǵan qosa sýdyń «kóleńkeli» naryǵy túbirimen joıylýǵa tıis. Halqymyz «Sýdyń da suraýy bar» dep beker aıtpaǵan», - dedi Prezıdent.

Memleket basshysy sý degenimiz – únemdep paıdalanbasa, tez taýsylatyn shekteýli resýrs ekendigine aıryqsha nazar aýdartty.

«Onsyz sharýalardyń kúni qarań. Sol sebepti bul salada zańsyzdyqqa jol berilmeıdi. Talapqa baǵynbaıtyndar qatań jazaǵa tartylady. Elimiz úshin sýdyń mańyzy munaı, gaz nemese metaldan kem emes. Sý sharýashylyǵy júıesin tıimdi damytý máselesimen derbes mekeme aınalysýy qajet dep sanaımyn. Sondyqtan Sý resýrstary jáne ırrıgatsııa mınıstrligi qurylady», - dedi Qasym-Jomart Toqaev.