Sý resýrstary komıtetiniń shtat sanyn kóbeıtý usynyldy

NUR-SULTAN. QazAqparat – QR Ekologııa, geologııa jáne tabıǵı resýrstar mınıstrligi Sý resýrstary komıtetiniń shtat sanyn kóbeıtýdi usyndy, dep habarlaıdy QazAqparat tilshisi.

Bul týraly atalmysh komıtet tóraǵasynyń orynbasary Dosbol Bekmaǵambetov Ortalyq kommýnıkatsııalar qyzmetinde aıtty.

Spıker sý resýrstary komıteti men onyń basseındik ınspektsııalaryn kúsheıtý qajettigin atap ótti.

«Komıtet quramynda sý resýrstaryn esepke alýǵa, óńiraralyq sý bólýge jáne sý salasyn perspektıvalyq damytýǵa jaýapty qurylymdyq bólimsheler qurylady. Ol úshin Sý resýrstary komıtetiniń shtat sanyn taǵy 21 orynǵa (39-dan 60-qa deıin) kóbeıtý kerek», - dedi ol.

Sonymen birge, sý resýrstaryn paıdalaný men qorǵaýǵa tıisti baqylaý men qadaǵalaýdy qamtamasyz etý úshin basseındik ınspektsııalar shtatyn taǵy 153 orynǵa (97-den 250-ge deıin) ulǵaıtý qajet.

Buǵan deıin Dosbol Bekmaǵambetov Qazaqstanda 2030 jylǵa qaraı sý resýrstarynyń tapshylyǵy 23,2 tekshe kılometrge jetýi múmkin ekenin aıtqan edi.

Eldiń shyǵys óńiri sý resýrstarymen anaǵurlym kóbirek qamtamasyz etilse, ortalyq Qazaqstan eń az qamtylǵan. Ońtústik jáne Batys óńirler shekaralas elderge táýeldi bolyp otyr.