Sý resýrstary mınıstrligi EQDB-men birlesken 23 jobany aıaqtaýdy josparlap otyr

<p>ASTANA. KAZINFORM &ndash; QR Sý resýrstary jáne ırrıgatsııa mınıstrligi jyl sońyna deıin Eýropalyq Qaıta Qurý jáne Damý bankimen birlesken 23 jobany aıaqtaýdy josparlap otyr, dep habarlaıdy mınıstrliktiń basapsóz qyzmeti.</p>

Sý resýrstary jáne ırrıgatsııa mınıstri Nurjan Nurjigitov Qazaqstandaǵy Eýropalyq Qaıta Qurý jáne Damý banki (EQDB) basshysynyń orynbasary Asqar Namazbaevpen kezdesti. Taraptar birlesken jobalardy iske asyrý jáne odan ári yntymaqtastyq múmkindikterin talqylady.

Máselen, mınıstrlik pen Eýropalyq Qaıta Qurý jáne Damý banki Aqtóbe, Jambyl jáne Túrkistan oblystarynda sý sharýashylyǵy nysandaryn rekonstrýktsııalaý boıynsha 53 jobany iske asyrýda. Búgingi tańda 19 joba tolyǵymen aıaqtaldy. Jyl sońyna deıin taǵy 23 jobany aıaqtaý josparlanýda, onyń 17-si paıdalanýǵa beriledi.

Qalǵan jobalar boıynsha qurylys jumystaryn kelesi jyly aıaqtaý josparlanyp otyr.

«Biz Eýropalyq Qaıta Qurý jáne Damý bankimen yntymaqtastyqty jalǵastyrýǵa nıettimiz. Bizdiń mınıstrliktiń aldynda Qazaqstannyń sý salasyn transformatsııalaý mindeti tur, biz bul jumysty halyqaralyq qarjy ınstıtýttarymen birge júzege asyrýdy josparlap otyrmyz», – dedi Sý resýrstary jáne ırrıgatsııa mınıstri Nurjan Nurjigitov.

Osyǵan deıin Sý resýrstary jáne ırrıgatsııa mınıstrligi sý salasyn tsıfrlandyrýǵa nıettenip otyrǵany týraly jazdyq.