Sý qoımalary egin naýqanyna daıyn ba – mınıstrliktiń jaýaby

<p>ASTANA. KAZINFORM &ndash; Elimizdiń birneshe óńirinde sý qoımalary men kanaldar jazǵy maýsymǵa daıyndalyp jatyr. Tolyǵyraq Sý resýrstary jáne ırrıgatsııa mınıstrliginiń resmı ókili Móldir Ábdýalıeva aıtyp berdi.</p>

«Sýarý maýsymyna daıyndyq aıasynda D.Qonaev atyndaǵy Úlken Almaty kanaly «Qazsýshar» fılıaly 30 gıdrobeketke, onyń ishinde Kúrti sý qoımasyndaǵy gıdrobeketke de jóndeý júrgizildi. Pavlodar oblysy boıynsha «Qazsýshar» fılıaly Shiderti lımandy sýarý júıesine sý jiberýdi jalǵastyryp jatyr. Búginde 40,4 mln tekshe metr sý jınalyp, 11,5 myń gektar lıman saǵasy toltyryldy. Sondaı-aq, Kólbaı lımandy sýarý júıesine sý jiberý jumysy júrip jatyr», - dedi Móldir Ábdýalıeva OKQ-de ótken brıfıngide.

Odan bólek, atalǵan óńirde Belovod toptyq sý qubyrynda aınalymdy sýmen jabdyqtaý júıelerin jóndeý, magıstraldyq jelini tekserý jáne qajet bolǵan jaǵdaıda qudyqtardaǵy erigen qar sýyn aıdaý jumystary júrgiziledi. Sonymen qatar sý tasqynynyń aldyn alý úshin №1 sorǵy stansasynda bóget salynyp jatyr.

«Egis alqaptaryn sýmen qamtamasyz etý sapasyn jaqsartý úshin «Qazsýshar» mekemesiniń Túrkistan oblystyq fılıaly memleketaralyq «Hanym» kanalynyń 15 myń tekshe metrden astam bóliginde mehanıkalyq tazalaý jumysyn júrgizip, 17 myń tekshe metrden astam laı tunbasy shyǵaryldy. Sondaı-aq, Túrkistan óńirlik fılıaly «Naıman» kanalynyń 6 shaqyrym bóligine beton tósedi», - deıdi spıker.