ASTANA. QazAqparat - Sý dobynan Qazaqstan erler quramasy Sıngapýrde ótken 2023 jylǵy Azııa chempıonatynda qola medal aldy, dep habarlaıdy QazAqparat tilshisi.
Qazaqstandyq sportshylar úshinshi oryn oıynda Taılandty 18:7 esebimen tize búktirdi. Kezdesýde Murat Shákenov úzdik oıynshy atandy.
Qola medal alǵan Qazaqstan quramasy álem chempıonaty joldamasyna qol jetkizdi. El quramasy qurlyqtyq dodada qatarynan eki márte úshinshi oryn alyp otyr.
Qazaqstandyq sportshylar toptyq kezeńde Fılıppındi 19:6, Gonkongty 22:7 esebimen jeńse, Iranǵa 14:15 esebimen ese jiberdi. Al shırek fınalda Sıngapýrdy 10:7 esebimen tize búktirgen edi.
Al jartylaı fınalda Qytaıǵa 1:10 esebimen jol berdi.
Eske salsaq, sý dobynan Azııa birinshiliginde Qazaqstan áıelder quramasy bir týr buryn chempıon atanǵan edi.
Olar búgin Ózbekstandy 12:6 esebimen jeńdi. Osylaısha qatarynan barlyq alty oıynda jeńiske jetti.
Ádiljan Úmbet
1996 jyly Ál-Farabı atyndaǵy Qazaq memlekettik ulttyq ýnıversıtetiniń jýrnalıstıka fakýltetin támamdaǵan. Eńbek jolyn 1996 jyly Almaty qalalyq «Almaty aqshamy» gazetinde bastady. Odan keıin jyldarda Qorqyt ata atyndaǵy Qyzylorda memlekettik ýnıversıtetinde, «Aqmeshit aqshamy», «Syr boıy» gazetterinde qyzmet atqaryp keledi.
2015-2020 jyldarda «Aqmeshit aptalyǵy» gazetiniń bas redaktory boldy.
Negizgi qyzmetimen qosyp 2006-2014 jyldarda respýblıkalyq «Jas Qazaq», «Alash aınasy» gazetteriniń Qyzylorda oblysyndaǵy menshikti tilshisi bolyp eńbek etti.
2018 jyldan beri «Kazinform» aqparat agenttiginde Qyzylorda oblysyndaǵy menshikti tilshi.