Sý boıynsha Qazaqstannyń Qyrǵyzstanǵa eshqandaı ókpesi joq - Qyrǵyz AShM

BІShKEK. QazAqparat – Qyrǵyzstan aýyl sharýashylyǵy mınıstrligine qarasty sý resýrstary qyzmetiniń dırektory Almazbek Sokeev baspasóz máslıhatynda sý máselesi boıynsha Qazaqstan tarapynan Qyrǵyzstanǵa eshqandaı narazylyq joq ekenin aıtty, dep habarlaıdy QazAqparattyń menshikti tilshisi.

Vedomstvo basshysy qazaqstandyq áriptesterimen telefon arqyly sóıleskenin jetkizdi, aıtýynsha, olar shaǵym joq ekenine sendirgen.

17-19 shildede Qazaqstan tarapynyń ótinishi boıynsha Kırov sý qoımasynan sý bólý jáne sý berýdi 45 m3/sek deıin ulǵaıtý máseleleri boıynsha Qyrǵyzstan jáne Qazaqstan ókilderiniń kezdesýi ótti.

Qazaqstandyq áriptesterdiń kelisimimen eki taraptyń qol qoıylǵan hattamasyna sáıkes 2023 jyldyń 4 tamyzyna deıin sý deńgeıi túsiriledi.

Lımıttiń aıaqtalýyna baılanysty osy jyldyń 5 tamyzynan bastap QR-ǵa sý berý toqtatyldy.

Sondaı-aq, Kırov sý qoımasyna aǵyn ulǵaıǵan jaǵdaıda Qyrǵyzstan Qazaqstanǵa sý berý máselesin qaraıtyny habarlandy.

Vedomstvonyń málimetinshe, Kırov sý qoımasynyń jobalyq kólemi 550 mln m3.

Sý Qyrǵyzstan men QR arasynda qol qoıylǵan sý bólý kestesi men hattamasyna sáıkes berilgen.

Vedomstvo búginde qyrǵyz tarapy Qazaqstan aldyndaǵy búkil mindettemelerin oryndaǵanyn atap ótti.

2023 jylǵy 22 tamyzdaǵy jaǵdaı boıynsha Kırov sý qoımasynyń kólemi - 14,5 mln m3, bul ótken jylǵy kórsetkishten 92,1 mln m3 kem.

Búginde 0,7 m3/sek (ótken jyly – 13,7 m3/sek) sý túsip jatyr, aǵyn ulǵaımaǵan.

Sheneýnik Shý ózeni arqyly sý berýge qatysty málim etkendeı, qazirgi ýaqytta Qazaqstanǵa Georgıevsk magıstraldyq kanaly arqyly 6,5-7 m3/sek, al jalpy 9,5-10 m3/sek jiberilip jatqanyn habarlady, bul 20% lımıtti quraıdy.

Sý resýrstary qyzmetiniń basshysy Qyrǵyz-Qazaqstan shekarasynda júk kólikteriniń kóp jınalýymen baılanysty jaǵdaıdy sý toqtatýmen baılanystyrmaıdy.